Տեխասում եւ Օկլահոմայում տոռնադոյից եւ հեղեղումներից զոհերի թիվը հասել է 21

ԱՄՆ-ի Տեխասի եւ Օկլահոմայի նահանգներում տոռնադոյի եւ հեղեղումների հետեւանքով զոհվածների թիվը վերջին վեց օրվա ընթացքում հասել է 21-ի: Անհայտ կորած է համարվում 11 մարդ, տեղեկացնում է CNN հեռուստաընկերությունը:

Տարերքի հարվածներից տուժած նահանգների մի շարք շրջաններում անձրեւները դեռեւս շարունակվում են, եւ գետերի ջրի մակարդակը բարձրանում է: Դա ոչ միայն դժվարացնում է փոթորկի հետեւանքների վերացման աշխատանքները, այլեւ ավելացնում է այն մարդկանց թիվը, ովքեր հարկադրված են հեղեղման սպառնալիքի պատճառով լքել իրենց տները:

Տեխասի Ֆորտ Ուորտ քաղաքի հարյուրավոր բնակիչների իշխանությունները հանձնարարել են ժամանակավորապես տեղափոխվել ավելի անվտանգ վայր, քանի որ մերձակայքոն հոսող Բրեյզոս գետը առաջիկա գիշերը կարող է այն ամբողջությամբ հեղեղել:

Ինչպես նշվում է, տարերքը հարվածել է նաեւ Մեքսիկային, որտեղ զոհվել է 14 մարդ:

Տեխասի եւ Օկլահոմայի հեղեղված քաղաքների իշխանությունները ձեռնպահ են մնում տարերքի պատճառած վնասի չափերի կոնկրետացումից, որի չափերը ժամ առ ժամ մեծանում են: Նշվում է, որ ավերվել են հարյուրավոր բնակելի շենքեր, տարհանվել են տասնյակ հազարավոր մարդիկ, շարքից դուրս են եկել տասնյակ կիլոմետրերի հասնող ավտոճանապարհներ: Առայժմ, ինչպես հայտարարվել է, բոլոր ուժերն ու միջոցներն ուղղվել են մարդկային նոր հնարավոր զոհերի կանխմանը եւ դժբախտության մեջ հայտնված մարդկանց օգնություն ցուցաբերելուն, հաղորդել է ՏԱՍՍ-ը: