Ինչու Ալիևը չեղարկեց Գրանադայի հանդիպումը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Hraparak.am- ը գրում է. 

Երեկ Ադրբեջանի նախագահ Իլհամ Ալիեւը հայտարարեց, որ հրաժարվում է մասնակցել իսպանական Գրանադա քաղաքում այսօր կայանալիք հնգակողմ հանդիպմանը։ Եվրոպական քաղաքական համայնքի գագաթնաժողովի շրջանակներում հոկտեմբերի 5-ին Գրանադայում  նախատեսվում էր Փաշինյանի ու Ալիեւի հանդիպումը՝ հնգակողմ ֆորմատով՝ ԵՄ նախագահի, Ֆրանսիայի նախագահի եւ Գերմանիայի կանցլերի մասնակցությամբ։ Պարզվում է՝ Ադրբեջանին դուր չի եկել Արցախում իր ցեղասպան գործողությունների նկատմամբ Ֆրանսիայի դիրքորոշումը՝ այն որակել է «ապակառուցողական»։ Հանդիպումը տապալելու պատճառներից մյուսն էլ, ըստ ադրբեջանական մամուլի, Թուրքիայի նախագահի՝ հանդիպմանը մասնակցելու հարցում Փարիզի եւ Բեռլինի անհամաձայնությունն է եղել։

Նշենք, որ, ըստ իշխանական շրջանակներից ստացած տեղեկությունների, հոկտեմբերի 5-ին արեւմտյան հարթակն Ալիեւին պարտադրելու էր՝ տալ համաձայնություն խաղաղության պայմանագրի դրույթներին, եւ, կարելի է ասել՝ սեւագիր տարբերակն էր ստորագրվելու, որի վերաբերյալ հայտարարություն էր նախատեսվում։ Խոսում էին նաեւ, որ չեղարկվելու է 2020-ի նոյեմբերի 9-ի հայտարարությունը, մասնավորապես դրա 9-րդ կետը, որով կարգավորվում է ճանապարհների ապաշրջափակումը, եւ ապաշրջափակված ճանապարհների վերահսկողությունն իրականացվում է ռուսական սահմանապահների կողմից։ 

Երեկ այն պահից, երբ հայտնի դարձավ, որ Ալիեւը տապալում է Գրանադայի հանդիպումը, հայ փորձագիտական եւ քաղաքական շրջանակներից չարագույժ կանխատեսումներ հնչեցրին, փորձագետների մի խումբ կարծիք հայտնեց, թե Ալիեւը նոր պատերազմ է պատրաստում Հայաստանի դեմ, որպեսզի ստանա իր ուզած Զանգեզուրի միջանցքը, հենց այդ պատճառով չի գնում Գրանադա, որ արեւմտյան երկրների ճնշման ներքո փաստաթուղթ չստորագրի, չնայած այդ փաստաթուղթն ամբողջովին բխում է իրենց շահերից։ Նիկոլ Փաշինյանը, կառավարության հետ հարցուպատասխանի ժամանակ անդրադառնալով Գրանադայի հանդիպմանը, հայտարարեց, որ, անկախ ամեն ինչից, ՀՀ պատվիրակությունը մասնակցելու է. «Մենք չենք չեղարկել, մեկնում ենք եւ այնտեղ ունենալու ենք հանդիպումներ եւ փորձելու ենք ավելի դետալացված մեր դիրքորոշումները ներկայացնել: Իհարկե, ցավում ենք, որ հանդիպումը տեղի չունեցավ, բայց հույս ունենք, որ հայեցակարգային փաստաթուղթը, որը դրված է սեղանին, հարմար պահի կստորագրվի: Ես պատրաստ եմ այդ պայմանագիրը ստորագրել եւ ցավում եմ շատ, որ վաղն առիթ չեմ ունենալու հայտարարել, որ այդ շատ կարեւոր որոշումը կայացվեց»:

Փորձեց նաեւ Ալիեւի քայլից քաղաքական դիվիդենտներ շահել եւ նրա չներկայանալը որպես իր հաղթանակ ներկայացնել։ «Հիշում եք՝ մի քանի օր առաջ ընդդիմադիրներն ասում էին՝ փակենք օդանավակայանի ճանապարհները, որ վարչապետը չգնա Գրանադա, գնում՝ այնտեղ ստորագրում է մի փաստաթուղթ, որը չգիտեմ ինչ է անելու: Մենք մինչեւ այս պահն էլ հաստատել ենք մեր՝ Գրանադա այցելությունը, ընդ որում՝ շատ կառուցողական եւ լավատես էինք տրամադրված, որովհետեւ մտածում էինք, որ կա հնարավորություն՝ շրջադարձային նշանակության փաստաթուղթ ստորագրելու: Ըստ էության, մինչեւ այս առավոտ այդ հավանականությունը շատ բարձր էինք գնահատում: Դա այն փաստաթուղթն է, որը խամաճիկային ընդդիմությունն ամեն ինչ անում էր, որ ներկայացվի որպես կործանարար փաստաթուղթ: Հիմա քանի որ չստացվեց, Հայաստանը հստակ տրամաբանված, կառուցողական դիրքորոշում արտահայտեց, իր տեսակետները հասկանալի դարձրեց, եւ, հասկանալիորեն, օդանավակայանի ճանապարհը ոչ ոք չի կարող փակել, հետո տեսանք՝ ինչ եղավ: Պարզվեց, որ նախատեսված հանդիպումը չի կայանում ամենեւին ոչ մեր մեղքով»,- ասաց նա:

Քաղաքագետ Սուրեն Զոլյանի կարծիքով՝ Գրանադայի հանդիպման չեղարկմամբ Ալիեւը հերթական անգամ հաստատում է, որ կանգ չի առնելու ոչ մի բանի առջեւ եւ ինչ կարողանալու է, պոկելու է Հայաստանից․ «Շատերի համար, նաեւ՝ ինձ, ակնհայտ էր, որ Գրանադայում ոչ մի փաստաթուղթ չի ստորագրվելու, որովհետեւ Ալիեւը դեռ ամեն ինչ չի վերցրել։ Ալիեւը հասկանում է, որ այսօր Նիկոլ Փաշինյանը միայնակ չի կարող իր հետ խոսել, բանակցել եւ իր «պապաների»՝ արեւմտյան միջնորդների միջոցով է դա անում, որոնք փորձելու են ինչ-որ ձեւով խանգարել Ալիեւին, ասենք՝ չկիսեն Ալիեւի մաքսիմալիստական ծրագրերը եւ այլ փաստաթուղթ պարտադրեն, ուստի իրեն հեչ պետք չէ նման հանդիպումը»։ Ալիեւը, Զոլյանի դիտարկմամբ, իրեն առավել քան վստահ է զգում եւ կարողանում է տորպեդահարել ցանկացած՝ իր համար ոչ հաճելի ֆորմատներ․ «Ի՞նչ սպասել Ալիեւի հերթական տապալումից՝ ոչ մի լավ բան։ Նա փորձելու է կյանքի կոչել թուրք-ադրբեջանական երազանքը՝ միջանցքը։ Իսկ միջանցքը փորձելու է ստանալ ռազմական ճանապարհով։ Եթե այս իրավիճակում հաշվի առնենք, թե Հայաստանն ինչպես փչացրեց ՌԴ-ի հետ հարաբերությունները, ապա նման պայմաններում, իհարկե, շարունակվելու են ՀՀ-ի նկատմամբ ադրբեջանական ճնշումները։ Իսկ եթե արեւմտյան ֆորմատում որեւէ փաստաթուղթ ստորագրվեր, հնարավոր է Ալիեւին խոչընդոտեր իր մաքսիմալիստական ձգտումներին հասնելու ճանապարհին։ Տրամաբանությունը շատ պարզ է՝ ինչո՞ւ պիտի Ալիեւը կանգ առնի, եթե որեւէ խոչընդոտ չի տեսնում, քանի որ կարող է իրագործել իր ձգտումները, իսկ առավելագույնը, այսպես կոչված, «Արեւմտյան Ադրբեջանի» գաղափարը կյանքի կոչելն է, ինչի մասին բազմիցս է խոսել»։