26 մլն դրամի ոսկի են գողացել. Կազմակերպիչը պետական հատուկ ծառայության աշխատակից է

Հատուկ քննչական ծառայությունը նոր մանրամասներ է հայտնում «Գեոպրոմայնինգ Գոլդ» ՍՊԸ-ից առանձնապես խոշոր չափերով ոսկի պարունակող խտացաված հանքանյութի գաղտնի հափշտակություն մասին:

Ըստ ՀՔԾ հաղորդագրության՝ նախաքննության ընթացքում պարզվել է, որ պետական հատուկ ծառայություն իրականացնող Գ. Դ.-ն 2014թ.-ին հանցավոր համաձայնության է եկել «Գեոպրոմայնինգ Գոլդ» ՍՊԸ ընկերության ոսկու կորզման ֆաբրիկայի տարածքի պահապանությունն իրականացնող անձանց եւ նույն ընկերության այլ աշխատակիցների հետ՝ գաղտնի հափշտակելով առանձնապես առանձնապես խոշոր չափերով ոսկու խտանյութ:

2015թ. մայիսի վերջին կազմակերպված խմբի անդամ, ընկերության գլխավոր արտադրամասի աշխատակցի կողմից հատուկ ծառայություն իրականացնող աշխատակիցների թողտվությամբ հափշտակված եւ ընկերությունից դուրս բերված ոսկու պարունակությամբ խտանյութը փոխանցել է նույն ընկերության մեկ այլ աշխատակցի: Վերջինս խտանյութը վերամշակելով՝ ստացել է առանձնապես խոշոր չափերի՝ ավելի քան 26 մլն ՀՀ դրամ արժողության 1448,91 գրամ ոսկի, որն առանձին մասերով վաճառվել է ոսկու առեւտրով զբաղվող անհատ ձեռնարկատեր հանդիսացող Թ. Ա.-ին եւ Ա. Պ.-ին:

Գ. Դ.-ին մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 1-ին եւ 2-րդ կետերով, եւ վերջինիս նկատմամբ, դատարանի որոշմամբ, որպես խափանման միջոց ընտրվել է կալանավորումը:

Նշենք, որ հիշյալ քրեական գործի նախաքննության ներկա փուլում որպես մեղադրյալ ներգրավել են կազմակերպված խմբի եւս 7 անդամներ, որոնցից 2-ի նկատմամբ նույնպես դատարանի որոշմամբ, որպես խափանման միջոց ընտրվել է կալանավորումը: Նախաքննությունը շարունակվում է:

Հիշեցնենք, որ NEWS.am-ի տեղեկություններով՝ ոսկու կորզման ֆաբրիկայից խոշոր չափերով խտանյութ հափշտակելու գործով հետախուզման մեջ էր գտնվում Երեւանի Կիեւյան կամրջից 2016թ. հունվարի 30-ին կնոջ ներկայությամբ ցած նետվելով ինքնասպանություն գործած 50-ամյա տղամարդը, որը ընկերության արտադրության պետն էր: