ԵՄ ԱԳ նախարարները կքննարկեն Մերձավոր Արևելքի, Ուկրաինայի և Հայաստանի խնդիրները

Եվրամիության ԱԳ նախարարներն այսօր Լյուքսեմբուրգում կանցկացնեն արտաքին գործերի խորհրդի հերթական նիստը, որի հիմնական թեմաները կլինեն պաղեստինա-իսրայելական հակամարտությունը, ինչպես նաև Ուկրաինայում տիրող իրավիճակը և Հայաստանի ու Ադրբեջանի հակամարտությունը, հայտնում է ՌԻԱ Նովոստին։

Հայաստանի և Ադրբեջանի միջև կարգավորման առնչությամբ կքննարկվի եվրոպական միջնորդությունը, ինչպես նաև ԵՄ աջակցության ավելացումը և Հայաստանի հետ համագործակցությունը։

 

Եվրոպացի ներկայացուցչի խոսքով` Մերձավոր Արևելքում հակամարտությունը քննարկելիս նախարարները կանդրադառնան տարածաշրջանում հետագա էսկալացիայի կանխման ուղիներին, մարդասիրական օգնությանը, պատանդների ազատմանը, խաղաղ բնակչության պաշտպանությանը։

Գազայում հրադադարի կոչերին միանալու ԵՄ-ի մերժման մասին հարցին ի պատասխան եվրոպացի դիվանագետն ասել է, որ Իսրայելը Պաղեստինի հետ հակամարտությունում և ՀԱՄԱՍ-ի հետ առճակատման ժամանակ ինքնապաշտպանվելու իրավունք ունի և ինքն է որոշում է, թե ինչպես իրացնի այդ իրավունքը։

 

Աղբյուրը հավելում է, որ նախարարները նախատեսում են նաև լսել եվրոպական դիվանագիտության ղեկավար Ժոզեպ Բորելի զեկույցը Չինաստան կատարած այցի վերաբերյալ և քննարկել Սերբիան և Կոսովոն։