Պարզաբանում ենք ակնկալում․ Պեսկովը՝ Փաշինյանի հայտարարության մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մոսկվան Երևանի հետ շփումներում ակնկալում է տեղեկատվություն ստանալ այն մասին, թե ինչ նկատի ուներ ՀՀ վարչապետ Նիկոլ Փաշինյանը՝ խոսելով անվտանգության ոլորտում հարաբերությունները դիվերսիֆիկացնելու անհրաժեշտության մասին։ 

Այս մասին լրագրողներին ասել է Ռուսաստանի նախագահի մամուլի քարտուղար Դմիտրի Պեսկովը։ Նրա խոսքով, Մոսկվայում հակված չեն կարծիք կազմելու «Wall street journal»–ին տված հարցազրույցի արդյունքում։

«Ռուսաստանն ու Հայաստանը թերթի միջոցով չէ, որ պետք է իրար հետ շփվեն, առավել ևս` «Wall Street Journal»–ի։ Դրա համար էլ մենք շարունակում ենք երկխոսությունները մեր հայ բարեկամների հետ, մենք շատ ընդարձակ օրակարգ ունենք»,-ընդգծել է Կրեմլի խոսնակը։

Պեսկովը հավելել է, որ Ռուսաստանը շարունակում է Հայաստանին և Ադրբեջանին օգնելու փորձեր ձեռնարկել խաղաղության պայմանագրի կնքման համար։ Նրա խոսքով, դա անհրաժեշտ է տարածաշրջանում իրավիճակի կայունացման և ողջ տարածաշրջանում ավելի դրական ստեղծարար կենսամակարդակի հասնելու համար:

Հիշեցնենք՝ հոկտեմբերի 25-ին ամերիկյան Wall Street Journal թերթին տված հարցազրույցում Նիկոլ Փաշինյանը հայտարարել էր, որ Ռուսաստանի Դաշնության խաղաղապահ զորախումբը չի կարողացել կամ չի ցանկացել ապահովել Լեռնային Ղարաբաղի հայության անվտանգությունը, ու այդ իրադարձություններն, ըստ էության, հանգեցրել են մի որոշման, որ Հայաստանը պետք է դիվերսիֆիկացնի հարաբերություններն անվտանգության ոլորտում։