Ուկրաինային օգնությունը շարունակելու պայմանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

ԱՄՆ Սենատի Հանրապետական խմբակցության անդամները թարմացրել են ԱՄՆ սահմանների պաշտպանության ապահովման համալիր միջոցառումների իրենց առաջարկները՝ ներառելով նաեւ Ուկրաինային ռազմական օգնության ցուցաբերման մասին կետ։ Սակայն դրա համար որպես նախապայման է սահմանվել այն, որ շարունակվելու է ամերիկա-մեքսիկական սահմանին պատի կառուցումն ու հակաիմիգրացիոն այլ միջոցառումները։ Այս մասին հայտնում է Associated Press պարբերականը։

Հոկտեմբերին, հիշեցնենք, ԱՄՆ նախագահ Ջո Բայդենը Կոնգրեսին հարցում էր ուղարկել Ուկրաինային եւ Իսրայելին 105 միլիարդ դոլարի օգնության հատկացման համար, որտեղ 14 միլիարդ դոլարը հատկացվելու էր ամերիկա-մեքսիկական սահմանին միգրանտների հոսքի դեմ պայքարին։ Սակայն հանրապետականները հայտարարել էին, որ Սպիտակ տան առաջարկը բավարար հիմնավորված չէ։ Սենատում Հանրապետական խմբակցության ղեկավար Միտչ Մաքքնելը հայտարարել է, որ համալիր միջոցառումների նախագիծը լավագույն տարբերակն է հանրապետական սենատորներին ներգրավելու համար, որպեսզի 60 ձայնը, որն անհրաժեշտ է նախագծի անցկացման համար, հավաքվի, սակայն պայմանով, որ բոլոր դեմոկրատ սենատորներն աջակցեն։ Սակայն դեմոկրատները, համաձայն ամերիկացի վերլուծաբանների, դժվար թե միանգամից միանան այս նախաձեռնությանը, քանի որ մշակում են Բայդենի հարցումը բավարարող նախագիծ։ Նրանք նաեւ ձգտում են փոխզիջման հասնել բյուջետային ծախսերի նախագծի հարցում, որը կառավարությանը թույլ կտա աշխատել նոյեմբերի 17-ից հետո, երբ կլրանա ներկա օրինագծի գործողության ժամկետը։
Բանն այն է, որ հանրապետականների շրջանում ավելի ու ավելի է աճում նրանց թիվը, ովքեր կասկածում են կամ դեմ են Ուկրաինային ռազմական օգնության հատկացումները շարունակելու նպատակահարմարությանը՝ շեշտելով, որ ամերիկյան սահմանների պաշտպանության ապահովումն ավելի կարեւոր է։ Անցյալ շաբաթ Կոնգրեսի Ներկայացուցիչների պալատը 14 միլիարդ դոլար հատկացրեց Իսրայելին։ Այդ ժամանակ պալատի խոսնակ Մայք Ջոնսոնը հայտարարեց, որ հաջորդ անգամ միացյալ օգնության նախագիծ կքննարկվի, որը կներառի Ուկրաինային օգնության տրամադրման շարունակումն ու սահմանների պաշտպանության ապահովումը։ Հանրապետական սենատոր Ջիմ Լենքգորդն էլ հայտարարել էր, որ չեն ապահովի այլ երկրների անվտանգությունը՝ առանց Ամերիկայի անվտանգության մասին ըստ պատշաճի հոգ տանելու։

Վերլուծաբանները նկատում են, որ սահմանային հարցում համաձայնության գալը դժվար կլինի, եւ դա կարող է խանգարել Ուկրաինային ռազմական օգնության հատկացումները շարունակելուն, քանի որ իմիգրացիան տասնամյակներ շարունակ մնում է Կոնգրեսում ամենից դժվարլուծելի հարցերից մեկը։ Հանրապետականները հույս ունեն, որ կկարողանան ճնշում գործադրել դեմոկրատների վրա եւ հարկադրել ընդունել իրենց առաջարկները՝ հաշվի առնելով, որ հոկտեմբերին օրական սահմանը հատում է 8 հազար անօրինական միգրանտ, եւ Բայդենի վարչակազմը դժվարությամբ է կարողանում միգրանտների հետ կապված հարցերը կարգավորել։