Կալաձեն եւ Ալիեւը մեկնում են Իրան` գազի հարցով

 Իրանը պատրաստ է գազ մատակարարել ե’ւ Վրաստան, ե’ւ Եվրոպա:

Այս մասին, ինչպես հաղորդում է «Արմենպրես»-ը, հայտարարել է Վրաստանում Իրանի դեսպան Աբբաս Թալեբը:

Վրաստանյան «Ռեզոնանսի» թերթին տված հարցազրույցում իրանցի դիվանագետն ասել է, որ ներկայում տեխնիկական աշխատանքներ են կատարվում տվյալ հարցի լուծման համար:

Թերթը գրում է, որ տեղեկությունը հաստատել են նաեւ Վրաստանի էներգետիկայի նախարարությունում` միաժամանակ նշելով, որ պետք չէ շտապել եզրակացություններ անել:

«Իրանի համար գազի մատակարարումները քաղաքական բնույթի հարց չէ, եւ ոչ մի երկրի հետ մենք մրցակցության մեջ չենք մտնում: Իրանը պատրաստ է էներգետիկական ոլորտում համագործակցել Վրաստանի հետ եւ բավարար ծավալով գազ մատակարարել ինչպես ներքին պահանջարկի, այնպես էլ Եվրոպա տարանցելու համար», -ասել է նա:

Նրա խոսքով` իրանական գազը պատրաստ են Վրաստան մատակարարել ինչպես Հայաստանը, այնպես էլ Ադրբեջանը: Մանրամասները պետք է քննարկվեն Վրաստանի էներգետիկայի նախարար Կ. Կալաձեի՝ Թեհրան այցի ընթացքում:

APA-ն շտապել է հայտնել, որ Ադրբեջանի նախագահ Իլհամ Ալիեւը պատրաստվում է փետրվարի վերջին այց կատարել Իրան` նշելով, որ այս մասին հայտարարել է Ադրբեջանում Իրանի դեսպան Մոհսուն Փաք Այինը: Նրա խոսքով` այցը տեղի կունենա Իրանի նախագահ Հասան Ռուհանիի հրավերով:

«Պաշտոնական այցի ժամանակ փաստաթղթեր կստորագրվեն տնտեսական եւ էներգետիկ ոլորտներում համագործակցության մասին», -ասել է նա:

Չի բացառվում, որ Թեհրանում Ալիեւի բանակցությունների թեմաներից մեկն էլ կլինի Վրաստան իրանական գազի տարանցումը Ադրբեջանի տարածքով:

Ադրբեջանական ԶԼՄ-ները նշում են, որ այդ նպատակով Հայաստանի շրջափակված վիճակը պահպանելու համար Ալիեւը Թեհրանին գազի փոխադրման գործում «ձեռնտու պայմաններ է առաջադրելու»: