Երկու ընկեր, պոկեր և սեր. «Խաղասեղանին սերն է» ֆիլմը ներկայացվեց կինոսերներին

Ռոմանտիկ կատակերգություն` երկու ընկերների մասին: «Մոսկվա» կինոթատրոնում փետրվարի 11-ին տեղի ունեցավ «Խաղասեղանին սերն է» ռուսերեն ֆիլմի հայաստանյան պրեմիերան, որի հիմքում հայկական «Poker.am» կինոկատակերգության սյուժեն է:

Երկու ֆիլմերում էլ գլխավոր դերում հանդես է գալիս դերասան Հովհաննես Ազոյանը, ով փաստում է` նույն կերպարը խաղալը անհետաքրքիր է:

«Ես դեռ չեմ տեսել ֆիլմը, գիտեմ, որ ձայնս փոխել են` իրենց ասելով ակցենտի պատճառով ռուսական կինովարձույթում խնդիր կունենային: Ֆիլմը ռիմեյք է. 70 տոկոսով փոփոխված է: Ֆիլմը նկարահանել ենք Մոսկվայում, Լոս Անջելեսում և Լաս Վեգասում: Երկու ամիս ապրել եմ դերասանների հետ, մեծ հաճույք եմ ստացել, ընկերացել եմ նրանց հետ, Ալեքսանդր Ռևայից շատ բան եմ սովորել»,-«Արմենպրես»-ի փոխանցմամբ` նշեց Հովհաննես Ազոյանը, ով պրեմիերայից հետո մեզ հետ զրույցում նշեց, որ իր ձայնն իրեն ավելի է դուր գալիս:

Դերասանի համար այս կինոնկարը նոր դռներ է բացել.նա ստացել է մի շարք առաջարկներ, և պետք է որոշի, թե ինչ դերեր ընտրի:

Ֆիլմը նկարահանել է ռուսական «Небо» կինոընկերությունը՝  «Централ Партнершип» և «Yellow, Black and White» ընկերությունների աջակցությամբ:  «Խաղասեղանին սերն է» ֆիլմի հիմքում ընկած է «Poker.am» կինոկատակերգության սյուժեն, որի  կինոֆրանշիզան «Շարմ Հոլդինգ»-ից ձեռք է բերել «Yellow, Black and White» ընկերությունը: Ֆիլմում օգտագործված է նաև «Poker.am»-ի սաունդթրեքը:

«Այն փաստը, որ Հայաստանում ստեղծված սցենարը և կոնցեպտը հետաքրքում է արտերկրին, շատ լավ է: Ինձ դուր եկավ: Նշանակում է` շատ լավ բան է ստացվել: Առաջարկ չի եղել, որ դերս պահպանեմ: Հովոն անփոխարինելի է, ինձ հաստատ կարելի է փոխարինել»,-նշեց «Poker.am»-ի գլխավոր դերակատարներից Միշոն:

«Խաղասեղանին սերն է» ռոմանտիկ կինոկատակերգությունը 2 ընկերների մասին է: Տղաներից մեկը՝  Կոնստանտինը,  շատ լավ պոկեր է խաղում և ծրագրել է մասնակցել պոկերի միջազգային մրցաշարին, իսկ մյուսը՝ Դավիթը, պատրաստվում է ամուսնության առաջարկություն անել սիրած աղջկան: Բայց հանգամանքներն այլ կերպ են դասավորվում, և գլխավոր հերոսները հայտնվում են որքան զավեշտալի, այնքան էլ՝  վտանգավոր իրավիճակներում: Նրանք ստիպված են լինում փոխվել տեղերով, արդյունքում՝ Կոնստանտինը պետք է փրկի Դավթի հարսանիքը, իսկ Դավիթը՝ ուժերը փորձի պրոֆեսիոնալ պոերում:

Նկարահանումներն իրականացվել են Ռուսաստանում և Միացյալ Նահանգներում (Լաս Վեգաս, Լոս Անջելես): Ֆիլմի ռեժիսորն է Արտյոմ Միխալկովը: Դերերում հանդես են գալիս Հովհաննես Ազոյանը, Անդրեյ Բուրկովսկին, Ալեքսանդր Ռևան, Եկատերինա Շպիցան, Ալլա Միխեևան և ուրիշներ: