Ադրբեջանը փորձում է խնդիրները լուծել սահմանին սրացումների միջոցով. Վլադիմիր Եվսեեւ

Ադրբեջանի կողմից իրավիճակի սրացման դեպքերը ռազմական փորձագետներն արհեստական են համարում, քանի որ Ադրբեջանի ռազմաքաղաքական ղեկավարությունը փորձում է ունեցած խնդիրները լուծել սահմանին սրացումների միջոցով: Արմենպրեսի փոխանցմամբ՝ Ռազմական փորձագետ Վլադիմիր Եվսեեւը մայիսի 7-ին տեսակամուրջի ընթացքում նկատեց, որ Լեռնային Ղարաբաղի հակամարտության կարգավորման հարցի հանգուցալուծումն ավելի է դժվարացել, իսկ սրացումները, մեխանիզմների փոփոխություններն ու նոր զինատեսակների կիրառումն առաջացնում են մտավախություն, որ պատերազմի վերսկսման հավանականությունը մեծացել է:

«Ադրբեջանի ղեկավարությունը մի շարք մտավախություններ ունի: Նախ, Բաքվում վախենում են, որ նավթային ռեսուրսը չի բավականացնի: Ադրբեջանը նկատում է, որ ԼՂ հակամարտության վերաբերյալ միջազգային հետաքրքրությունը պասիվացավ ուկրաինական ճգնաժամի հետեւանքով, եւ այդ ժամանակ Ալիեւը գնաց սրացման, որպեսզի միջազգային հանրությունը կրկին ուշադրություն հրավիրի այս տարածաշրջանին»,- ասաց Եվսեեւը` հավելելով, որ նման սրացումների նպատակներից մեկն էլ ԵԱՀԿ Մինսկի խմբի լուծարումն է:

Ռազմական փորձագետը հիշեցնում է, որ երբ Ալիեւը Բեռլինում հանդիպել է կանցլեր Մերկելին, խոսվել է ԼՂ հակամարտության կարգավորման գործում Գերմանիայի ներգրավման մասին: «Մինչդեռ Գերմանիան ԵԱՀԿ Մինսկի խմբի անդամ չէ, հետեւաբար, Ադրբեջանը ցանկանում է կամ մեծացնել ԵԱՀԿ Մինսկի խումբը, կամ էլ այլ ձեւաչափեր գտնել»,- ասաց Եվսեեւը` հավելելով, որ տարածաշրջանի մեծ պետությունները նույնպես չեն ցանկանում, որ պատերազմը վերսկսվի:

«Թուրքիան էլ, ՌԴ-ն էլ չեն ցանկանում այդ հակամարտության մեջ ներգրավված լինել, քանի որ եթե այդ երկրները ներգրավվեն, ապա պատերազմը կունենա տարածաշրջանային բնույթ: Պետք է ստեղծվի ձեւաչափ, որ նման սրացումներն ավելի հեշտ լինի չեզոքացնել»,- ասաց Եվսեեւը` հավելելով, որ առաջին հերթին պետք է շփման գծից հետ քաշել ոչ միայն դիպուկահարներին, այլեւ ծանր զրահատեխնիկան: