Շները հարձակվել են մոր և երեխայի վրա

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Թափառող շները պատուհաս են դարձել Գեղարքունիքի մարզի գրեթե բոլոր բնակավայրերի համար։ MediaHub-ը բազմաթիվ ահազանգեր է ստացել Սևան և Մարտունի համայնքների բնակիչներից, որոնք շների «դարդից» չգիտեն՝ ինչ անել, առավոտյան ժամերին հատկապես, վախենում են անգամ երեխաների մանկապարտեզ տանել։

«Մարտունու շուկայի մոտ օր օրի շատանում են շները, չգիտենք՝ էլ ում դիմենք կամ ինչ անենք։ Պիտի անպայման մեկին հոշոտեն, սպանեն, որ սկսեն պայքարե՞լ»,- մեզ հետ զրույցում ասաց համայնքի բնակիչներից մեկը՝ պնդելով, որ համայնքապետարանը մատը մատին չի տալիս խնդիրը լուծելու համար։

Համայնքապետարանից հակադարձում են․ իրենք անընդհատ մրցույթ են հայտարարում, բայց ոչ մի կազմակերպություն չի դիմում, որ հաղթի ու շներին ստերջացնի։

«2023 թվականի մարտ ամսին մի կազմակերպություն դիմեց, հաղթեց, մոտ 150 շուն ստերջացվեց, բայց համայնքում հազարավոր շներ կան։ Հետո, երբ պայմանագրի ժամկետը լրացավ, նոր մրցույթներ հայտարարվեցին, բայց ոչ ոք չի դիմում։ Խնդիրը բավականին լուրջ է, մենք էլ ենք դա հասկանում, բայց ոչ մի կազմակերպություն չի դիմում, ի՞նչ կարող ենք անել»,- մեզ հետ զրույցում ասացին Մարտունու համայնքապետարանից։

Սևանում խնդիրն ավելի լարված է. եթե Մարտունիում գոնե 150 ստերջացված շուն կա, ապա Սևանում անգամ մեկ այդպիսի շուն չկա։

«Քայլում ես, ու հանկարծ չորս կողմից մարդաբոյ շները հարձակվում են վրադ, եթե Աստված քո կողմից եղավ ու տարածքում այլ մարդ եղավ, որ վախեցնի էդ շներին, կփրկվես, եթե չէ, ապա բախտի քմահաճույքին ես մնում»,- մեզ հետ զրույցում ասաց Սևանի բնակիչներից մեկը։ 
 

Նա պատմեց, որ երեկ իր աչքի առաջ շները հարձակվել են երեխային գրկած կնոջ վրա։
«Մեր պատուհանի տակ էր, մտածեցի օգնեմ, ձեռքիս տակ առաջին ընկած բանը շերեփն էր, պատուհանից դուրս գցեցի՝ շների ուղղությամբ։ Վախից էն կողմ գնացին, բայց խեղճ աղջիկը մի քանի րոպե երեխային գրկած կանգնած տեղից չէր շարժվում, էնքան էր վախեցել»,- պատմեց մեր զրուցակիցը: 

Սևանի համայնքապետարանից չհերքեցին․ շների խնդիրը շատ լուրջ է համայնքում, չնայած՝ հարցը ամբողջ մարզի մասշտաբով է ակտուալ։

«Համայնքապետարանը բավականին անհանգստացած է այս հարցով․ իններորդ մրցույթն ենք անցկացնում, որ որևէ կազմակերպություն հաղթող ճանաչվի ու սկսի շների ստերջացումը։ Բայց չկա կազմակերպություն, որ չափորոշիչներին համապատասխանի ու մասնակցի այդ մրցույթին։ Երեք տարի է՝ մրցույթ ենք հայտարարում, փորձում հարցին լուծում տալ»,- MediaHub-ի հետ զրույցում ասաց Սևանի համայնքապետարանի աշխատակազմի քարտուղար Արմենուհի Ղուկասյանը։

Նա նշեց, որ հունվար ամսին նորից մրցույթ է հայտարարվել, բայց համայնքապետարանում այլ տարբերակներ էլ են քննարկվում։

«Մենք առաջարկում ենք, որ մարզում գոնե մեկ մասնագիտացված կառույց լինի, որ հարցին լուծում տրվի։ Մենք նաև ԱԺ դիմում ենք ներկայացրել, խնդրել, որ մեր առաջարկները հետագայի համար ի գիտություն ընդունեն, որովհետև համայնքն ինքն իրենով հնարավոր է չկարողանա  հարցը լուծել, բայց մարզային կառույց եթե լինի, ավելի հեշտ կլինի թափառող շների դեմ պայքարն ակտիվացնել»,- նշեց Արմենուհի Ղուկասյանը։

Այսինքն՝ համայնքը դիմել է մարզպետարանին, ներկայացրել խնդիրը, տեղեկացրել, որ հարցը լուծում չի ստանում, քանի որ դիմող կազմակերպություն չկա, սակայն, որևէ դրական արձագանք չի եղել։

Գեղարքունիքի մարզպետարանի բնապահպանության և գյուղատնտեսության վարչության պետ Մարտին Պետրոսյանը հիմնավորեց՝ ինչու չեն արձագանքում այդ առաջարկին․ խնդիրը համայնքի լուծման դաշտում է։

«Մարզպետարանում նման կառույց ստեղծելու հնարավորություն չկա։ Մենք մեր մեթոդական առաջարկները ներկայացրել ենք համայնքապետարաններին։ Թափառող շների դեմ պայքարը համայնքի պարտավորությունն է, այսինքն՝ սեփական նախաձեռնությամբ իրենք պարտադիր պետք է իրականացնեն այդ գործառույթը»,- մեզ հետ զրույցում ասաց Պետրոսյանը։

Նա տեղեկացրեց, որ Գավառ համայնքում, օրինակ, խնդիրը լուծված է, կա կառույց, որը զբաղվում է շների ստերջացման հարցով, ու մարզպետարանը Գավառի օրինակը ներկայացրել է բոլոր համայնքներին։

Հարցին, որ համայնքները մրցույթ հայտարարում են, դիմող չի լինում, ի՞նչ կարող է անել այդ դեպքում համայնքապետարանը, Մարտին Պետրոսյանը պատասխանեց կարճ ու կոնկրետ՝ բա մարզպետարա՞նն ինչ անի։

Ո՛չ համայնքապետարանը գիտի՝ ինչ անի, ո՛չ մարզպետարանը, իսկ թափառող շները հստակ գիտեն իրենց անելիքը՝ մարդկանց ահաբեկել օրվա ցանկացած ժամի։

Նարե Գնունի