Ռաիսին հայտարարել է Իրանի և Պակիստանի միջև լարվածություն հրահրելու փորձերը կասեցնելու անհրաժեշտության մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Իրանի նախագահ Էբրահիմ Ռաիսին կոչ է արել լուրջ ջանքեր գործադրել Թեհրանի և Իսլամաբադի միջև լարվածությունը բորբոքելու փորձերը դադարեցնելու համար, գրում է Mehr-ը։

Շաբաթ օրը Պակիստանի նոր դեսպանի  հավատարմագրերը հանձնելու արարողությունից հետո Իրանի նախագահը հայտարարել է, որ «երկու եղբայրական երկրները կապված են անխզելի կապերով, և նրանց հարաբերությունները հիմնված են ընդհանուր կրոնի, մշակույթի և քաղաքակրթության վրա»:

«Ըստ Իրանի Իսլամական Հանրապետության, սահմանները տնտեսական փոխանակումների և հարևանների անվտանգության բարձրացման հնարավորություն են, և անհրաժեշտ է այդ հնարավորությունը պաշտպանել ցանկացած ապակայունացնող գործոնից»,- ասել է Իրանի նախագահը։

Նա Պակիստանի անվտանգությունը որակել է որպես «Իրանի անվտանգություն» և անդրադարձել «վերջին տարիներին ԱՄՆ-ի կողմից ստեղծված ահաբեկչական խմբավորումների գործունեության շատ կործանարար հետևանքներին տարածաշրջանում, հատկապես Իրաքում և Սիրիայում»։

Դատապարտելով ահաբեկչական խմբավորումների և դրսից դրված անձանց գործունեությունը որպես սպառնալիք տարածաշրջանի բոլոր երկրների համար՝ Ռաիսին ողջունել է տարածաշրջանային համագործակցությունը ահաբեկչության դեմ պայքարում։

Նա նաև Իրանի և Պակիստանի միջև ընդհանուր սահմանը որակել է որպես փոխադարձ զարգացման հնարավորություն և ընդգծել երկու երկրների բարձրաստիճան պաշտոնյաների վճռականությունը՝ զարգացնելու հարաբերությունները տարբեր, հատկապես առևտրային և տնտեսական ոլորտներում։

Իրանի նախագահը նաև ընդգծել է երկու երկրների հարաբերություններում ցանկացած քարոզչությանը լրջորեն հակազդելու անհրաժեշտությունը՝ հույս հայտնելով, որ Իրանում պաշտոնավարման ընթացքում Պակիստանի նոր դեսպանի ջանքերով արդյունավետ քայլեր կձեռնարկվեն երկու երկրների հարաբերությունների զարգացման ուղղությամբ։ 

Իր հերթին Պակիստանի դեսպանը ողջունել է «տարածաշրջանի երկրների միջև սերտաճում և սիներգիա ստեղծելու Իրանի նախագահի կոնկրետ ճանապարհային քարտեզը»։

Նա նաև ընդգծել է Իրանի հետ եղբայրական հարաբերություններն ամրապնդելու իր երկրի բարձրաստիճան պաշտոնյաների կամքն ու հանձնառությունը և ասել. «Պակիստանը երբեք թույլ չի տա թշնամիներին խախտել երկու երկրների սահմանները»։

«Չնայած Իրանի և Պակիստանի թշնամիների և չարակամների ջանքերին՝ վնասելու երկու երկրների հարաբերությունները, կապերը պատմական և ռազմավարական են, և Պակիստանը պատրաստ է Իրանի հետ եղբայրական հարաբերությունների նոր գլուխ  բացել»,- ասել է դեսպանը։