Ադրբեջանում նախագահ են ընտրում․ օկուպացված ԼՂ-ում ևս ընտրատեղամասեր են բացվել

Այսօր՝ փետրվարի 7-ին Ադրբեջանում մեկնարկել են արտահերթ նախագահական ընտրությունները, որոնք կանցկացվեն այդ երկրի երկարամյա ղեկավար Իլհամ Ալիևի 2023 թ․ դեկտեմբերին ստորագրած հատուկ հրամանագրով։

Ըստ Ադրբեջանի ԿԸՀ-ի՝ արտերկրում երկրի դիվանագիտական ​​ներկայացուցչություններում Ադրբեջանի քաղաքացիների քվեարկության գործընթացը կսկսվի նախ Կորեայում՝ Ադրբեջանի դեսպանատանը և կավարտվի Լոս Անջելեսում՝ ԱՄՆ գլխավոր հյուպատոսարանում։ Նշվում է, որ արտասահմանյան երկրներում քվեարկությունը կսկսվի ժամը 08:00-ին և կավարտվի տեղական ժամանակով 19:00-ին: 

Ադրբեջանի սահմաններից դուրս գտնվող քաղաքացիների ընտրական իրավունքն ապահովելու համար աշխարհի 37 երկրներում ձևավորվել է 49 ընտրատեղամաս։ Ինչպես ավելի վաղ պնդել են Ադրբեջանի ԿԸՀ-ում, արտահերթ նախագահական ընտրությունների կապակցությամբ Արցախի օկուպացված տարածքներում ևս ձևավորվել են տեղամասային ընտրական հանձնաժողովներ։ Նշվում է, որ Ղարաբաղյան տարածաշրջանում (Ադրբեջանի վերահսկողության տակ անցած հայկական բնակավայրերում - խմբ․) ստեղծվել է 26 ընտրատեղամաս։
Պաշտոնական հաղորդագրությամբ, ընտրողների թիվը հանրապետությունում է 6,5 միլիոն է։

Հիշեցնենք, որ Եվրախորհրդարանը հրաժարվել է դիտորդներ գործուղել Բաքու, իսկ ՌԴ Պետդուման հայտարարել է, որ իր ներկայացուցիչները կհետևեն ընտրությունների ընթացքին։ Ադրբեջանում, ի թիվս այլոց, դիտորդական առաքելություն կանցկացնեն նաև ԵԱՀԿ, ԱՊՀ, ԻՀԿ պատվիրակությունները։

Ընդհանուր առմամբ՝ ընտրական գործընթացին հետևելու համար հավատարմագրված են 790 միջազգային դիտորդներ, որոնք ներկայացնում են 72 միջազգային կազմակերպություններ՝ 89 երկրներից։ 

Երկրի ղեկավարի պաշտոնի համար պայքարում է 7 գործիչ․ հանրապետության գործող նախագահ Իլհամ Ալիևը, որի թեկնածությունն առաջադրել է իշխող «Ենի Ազերբայջան» (Նոր Ադրբեջան, խմբ.) կուսակցությունը, ադրբեջանական խորհրդարանի պատգամավորներ Զահիդ Օրուջը (ինքնառաջադրված), Ռազի Նուրուլաևը («Ազգայնական ճակատ» կուսակցության առաջնորդ), Գուդրաթ Հասանգուլիեևը («Ադրբեջանի միասնական ժողովրդական ճակատ» կուսակցության նախագահ), Ֆազիլ Մուստաֆան («Մեծ արարում» կուսակցության նախագահ), ինչպես նաև «Մեծ Ադրբեջան» կուսակցության առաջնորդ Էլշադ Մուսաևն ու ինքնառաջադրված Ֆուադ Ալիևը։