Այսօրվանից սկսվում է Մեծ պահքը, ինչ է կարելի անել, ինչ՝ ոչ
ՄշակույթՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Մեծ Պահքի շրջանում յուրաքանչյուր մարդ հոգեպես պատրաստվում է Տեր Հիսուս Քրիստոսի Հարությանն ու զղջում գործած մեղքերի համար: Այսպես է բացատրում Մեծ պահքի խորհուրդը Արարատյան Հայրապետական թեմի Զորավոր Սուրբ Աստվածածին եկեղեցու խորհրդակատար Տեր Վահան քահանա Առաքելյանը։
«Լինում է մարմնավոր և հոգևոր պահք։ Պահքը կարևոր նշանակություն ունի քրիստոնյաների համար, որովհետև մարդը իր մեղքերի համար ապաշխարհում է և Աստծուն ու ինքն իրեն խոստանում, որ այլևս երբեք այդ մեղքերը չի կրկնի: Եթե որևէ բանից կախվածություն ունի, պետք է ձերբազատվի և կարևոր է գիտակցումով անի՝ մտածելով, որ մեղք է և խանգարում է իրեն հոգևոր ճիշտ կյանքով և քրիստոնյանին վայել ապրելու համար»,- «Հայկական ժամանակ»-ի հետ զրույցում մանրամասնում է նա։
Հոգևորականը նկատում է՝ պահքի ընթացքում մարդը հրաժարվում է բացառապես կենդանական ծագում ունեցող ուտեստներից (մսեղեն, կաթնեղեն, ձկնեղեն, ձու), բուսական կերակուրներ ուտելով՝ թուլացնում է մարմնական ցանկությունները, որպեսզի հոգևոր ցանկություններն առաջ գան, մարդը հիշի, որ ինքը մարմնավոր էակ լինելուց զատ՝ նաև հոգևոր էակ է և ունենա ավելի շատ հոգևոր ձեռքբերումներ ու արդյունքներ իր կյանքում։
Տեր Վահանը ասում է՝ դա էլ է Մեծ պահքի կարևոր խորհուրդներից, երբ յուրաքանչյուր քրիստոնյա հնարավորություն ունի Սուրբ Հարությանը նախորդող պահքի շրջանում հանգամանալից անդրադառնալ ինքն իրեն։
«Պահքին ուղղորդում է ապաշխարհությունը, առանց դրա իզուր կլինեն մեր հոգևոր ապրումներն ու զգացումները մեղքերի համար, ապաշխարհությանը հաջորդում է խոստովանությունն ու մեղքերի թողությունը։ Պետք է դիմել հոգևորականին և խնդրել այդ թողությունը։ Հայ եկեղեցին խոստովանության երկու տեսակ ունի, մեկն ընդհանրականն է, երբ քահանան կամ խոստովանողը կարդում է բոլոր հնարավոր մեղքերը, որ մարդն այս աշխարհում կարող է գործել, և նա իր մտքի մեջ, անշուշտ, կունենա այն մեղքերը, որը գործել է։ Քահանան թողություն է տալիս Աստծու անունով։ Երկրորդը՝ հավատացյալը առանձին դիմում է այն քահանային, որին կցանկանա, որ նա դառնա իր խոստովանահայրը, և այդ քահանայի օրհնությամբ ձերբազատվում է իր մեղքերից»,- պարզաբանում է Տեր Վահանը։
Վերջինս նաև ասում է՝ եկեղեցի հաճախել միշտ է հարկավոր, իսկ պահեցողության ընթացքում առավել կարևոր է այցելելը և պատարագներին մասնակցելը: Ըստ նրա՝ պահքը չի կարող լինել ինքնանպատակ, որի ժամանակ մարդն ուղղակի իրեն զրկում է որոշակի ուտելիքներից։
Անդրադառնալով պահքի շրջանում պսակադրություն կատարելուն՝ նա ասում է. «Եկեղեցին հորդորում է չկատարել պսակադրություն և չի կատարում, որովհետև պահքը ինքնահայեցողության շրջան է, զուսպ ապրելու, իսկ պսակադրությունը և դրան հաջորդող արարողությունները մեծ խնջույքներ են ենթադրում։ Ինչ վերաբերում է Սուրբ Մկրտությանը, ապա այն կատարվում է՝ բացի պահքի Ավագ ուրբաթից»։
Միևնույն ժամանակ, ըստ հոգևորականի, պսակադրությունը կարող է կատարվել հիմնավոր պատճառներով, այդ դեպքում եկեղեցին ընդառաջում է պսակադրվող զույգին: Միայն մի դեպքում այն չի կարող կատարվել․ Մեծ պահքի ավագ շաբաթվա ընթացքում:
Զորավոր Սուրբ Աստվածածին եկեղեցու խորհրդակատարը ուրախությամբ շեշտում է՝ երիտասարդներն այժմ ավելի շատ հետաքրքրվածություն ունեն Մեծ պահքի խորհրդին, ավելի շատ են ներկա լինում հոգևոր արարողություններին։
Այս տարի Մեծ պահքը սկսվում է փետրվարի 12-ին և շարունակվելու է 48 օր։
1
2
3
4
5
1
2
3
4
5
1
2
5
