Իսրայելի նախկին վարչապետ Օլմերտը պատիժը կկրի «Մաասիյագու» բանտի արտոնյալ բաժնում

Իսրայելի նախկին վարչապետ Էհուդ Օլմերտը փետրվարի 15-ին կսկսի բանտային պատիժ կրել կոռուպցիայի եւ արդարադատությանը խոչընդոտներ ստեղծելու համար՝ դառնալով երկրի պատմության մեջ կառավարության առաջին ղեկավարը, որը հայտնվել Է ճաղերի հետեւում, տեղեկացնում Է «Արմենպրես»-ը: 

Թել Ավիվի մերձակա «Մաասիյագու» բանտում նա կանցկացնի 19 ամիս: Օլմերտը մեկուկես տարվա բանտարկության Է դատապարտվել Երուսաղեմում «Հոլիլենդ» հեղինակավոր բնակելի համալիրի կառուցմանն աջակցելու դիմաց կաշառքներ ստանալու համար: 70-ամյա նախկին վարչապետին բանտարկության եւս մեկ ամիս են հավելել այն բանի համար, որ  կոռուպցիոն  մեղադրանքների հետաքննության փուլում նա իր դիվանատան ղեկավար Շուլա Զաքենին համոզել Է վկայություն չտալ իր դեմ եւ փող Է առաջարկել լռելու համար:   

Իսրայելի բանտերի վարչությունը հայտնել Է, որ Օլմերտին կտեղավորեն «թիվ 10 բլոկում», որը նախատեսված Է այն բանտարկյալների համար, որոնց «այս կամ այն պատճառներով չի կարելի պահել» պատժական հաստատությունների «սովորական կոնտինգենտի հետ»: Նրա փոքրաթիվ հարեւաններից մեկը կլինի պետական գաղտնիքների եւս մեկ կրող՝ Իսրայելի նախկին նախագահ Մոշե Կացավը, որը յոթնամյա պատիժ Է կրում բռնաբարության համար:   

Արտոնյալ բլոկը բաղկացած Է վեց եռատեղ խցերից, յուրաքանչյուրը՝ ցնցուղով, զուգարանով, անհրաժեշտ կահույքով եւ հեռուստացույցով: Միջանցքում տեղակայված են հեռախոսներ, բլոկում կան սենյակներ ուսման եւ հանգստի համար, ճաշարան, գրադարան, սինագոգ, մարզասրահ, զբոսանքի փոքրիկ բակ:

Իսրայելի կառավարությունն Օլմերտն սկսել Է գլխավորել Է 2006 թվականին: Կոռուպցիոն սկանդալների պատճառով նա 2008 թվականի սեպտեմբերին հրաժարական Է տվել, բայց կառավարության ղեկավարի պարտականությունները շարունակել Է կատարել մինչեւ 2009 թվականի մարտը, երբ նրան փոխարինել Է ներկայիս վարչապետ Բենիամին Նաթանյահուն, հաղորդել Է ՌԻԱ Նովոստին:

Լուսանկարը` REUTERS