Ինչպե՞ս «պլան գցել» ընդդիմախոսների գրպանը

Լրատվամիջոցներից մեկը այսօր լուր է հրապարակել` «Քաղաքական կուսակցություն ստեղծած Միհրան Պողոսյանը շարունակում է հետախուզվել ՀՀ-ի կողմից՝ ներմուծված կոկաինի գործով» վերնագրով և հռետորական հարցադրում արել` թե ինչպես պետք է զբաղվի նա ՀՀ ներքաղաքական հարցերով, եթե նրա մուտքը արգելված է ՀՀ-ում, թմրամիջոցի գործով անցնող անձը ինչպես է հավակնում վարկանիշ ձեռք բերել:

Ամենևին չփորձելով կասկածի տակ առնել լրատվամիջոցի` իրադարձությունների վրա լույս սփռելու ազնիվ ցանկությունը, ֆիքսենք, որ այդ ազնիվ նպատակը իրագործելու ճանապարհին նա կամա թե ակամա ջուր է լցնում իշխանության ջրաղացին...

Պնդելով, որ քաղաքական հայտ ներկայացրած «Հայոց համազգային միասնություն» կուսակցության նախագահ Միհրան Պողոսյանը շարունակում է ՀՀ-ի կողմից հետախուզման մեջ գտնվել՝ «Կոկաինի» աղմկահարույց գործով, թյուր տպավորություն է ստեղծվում, թե նա հենց այդ գործով է հեռացել երկրից։ Մինչդեռ Պողոսյանը հետախուզման մեջ է 2019 թվականից` բացարձակապես այլ, թմրանյութի գործի համեմատությամբ աննշան` պաշտոնեական դիրքը ենթադրյալ չարաշահելու մի գործով։ Երկրորդ` կոկայինի աղմկահարույց գործը հարուցվել է այն ժամանակ, երբ Միհրան Պողոսյանը իր ներմուծած բեռի մեջ կասկածելի պարունակությամբ պարկեր է հայտնաբերել և զանգահարել է ՀՀ ԱԱԾ տնօրենին` հայտնելով այդ մասին։ Այսինքն` ինչ է ստացվում, մարդը ապրանքը բարեհաջող հասցրել է իր ցանկալի վայրը, այնուհետև ինքն իրեն «փուռն է տվել»...

Պրիմիտիվ դետեկտիվի սիրահարների համար գուցե զվարճալի հեքիաթ է, բայց տրամաբանության առումով լացելու բան է։ Բանն այն է, որ հայրենի իրավապահների համար սա դառնում է առիթ` ոչ թե բացահայտելու թմրանյութի ներմուծման և իրացման շղթան, այլ առիթ է դառնում Նիկոլի անձնական հակակրանքները սպասարկելու համար, այսպես կոչված, պլան գցել հերթական ընդդիմախոսի ջեբը։

Այսինքն, պատկերացնու՞մ եք, մարդը շրջանցելով մաքսային արգելքները, որտեղ մի լվացքի փոշի անհնար է անցկացնել առանց մաքսային մարմինների կողմից հայտնաբերվելու, մեկ տոննա կոկայինը բարեհաջող հասցնում է իր սեփական պահեստ, այնուհետև... զանգում է ԱԱԾ տնօրենին և խնդրում գալ, առգրավել, քրեական գործ հարուցել։ Իսկ ի՞նչ է անում ԱԱԾ֊ն` նույն Պողոսյանի նկատմամբ հետապնդում է իրականացվում ՀՀ ներմուծված 1 տոննա «կոկաինի» գործով՝ խմբի կազմում, նախնական համաձայնությամբ առանձնապես խոշոր չափերով թմրամիջոց ապօրինի իրացնելու և առանձնապես խոշոր չափերով թմրամիջոցի մաքսանենգություն կատարելու հատկանիշներով։

Հիմա, նույն հաջողությամբ, եթե վաղը իրավապահները որևէ ընդդիմախոսի մեղադրեն Տիտանիկը ծակելու մեջ, լրատվամիջոցը նույն հռետորական հա՞րցն է հնչեցնելու` ինչպես է քաղաքականությամբ զբաղվում մարդ, ով մեղադրվում է Տիտանիկը ծակելու մեջ։

Արմինե Նավասարդյան