ՌԴ-ում 3 հայի մահվան ելքով վթարը հարբած ռուս վարորդի պատճառով է եղել, նա կալանավորված է. մահացածի հայր

ՌԴ-ում 2015թ. դեկտեմբերին Հայաստանի 3 քաղաքացու մահվան պատճառ դարձած վթարի գործով կալանավորված է «Մադզա» մակնիշի ավտոմեքենայի վարորդը, որը վթարի պահին եղել է հարբած վիճակում: Այս մասին NEWS.am-ին ասաց վթարից մահացածներից Սարգիս Խաչատրյանի հայրը, որը դեպքից հետո եղել է ՌԴ-ում, հանդիպել քննիչի հետ:

«Մեղավորը եղել է «Մազդայի» ռուս վարորդը, հարբած եկել, խփել է, երեխեքի մեքենան գցել է  հանդիպակաց գոտի, մեկ ուրիշ մեքենա եկել, հարվածել է»,- ասաց Սամվել Խաչատրյանը՝ նշելով, որ, իր տեղեկություններով, դատաքննությունը շուտով կմեկնարկի:

Ավելի վաղ NEWS.am-ը հայտնել էր, որ 2015թ. դեկտեմբերի 26-ին Դոնի-Ռոստովի տարածաշրջանի Սալսկ-Պրոլետարսկ տեղական նշանակության ավտոճանապարհի 0.5 կմ-ին՝  Մանիչստրոյ գյուղի (բնակավայրի) մոտակայքում բախվել էին «ՎԱԶ-2114» մակնիշի т377ЕЦ61 եւ м599ЦМ57 համարանիշների եւ «Մազդա» մակնիշի х181МО61 համարանիշի ավտոմեքենաները:

Վթարի հետեւանքով 3 ՀՀ քաղաքացի էր զոհվել, մեկը՝ վիրավորվել:

Մահացածներից 45-ամյա Ստեփան Կոստանյանը եւ 25-ամյա Սարգիս Խաչատրյանը Կոտայքի մարզի Աբովյան քաղաքից էին: Ստեփան Կոստանյանը մեկ դուստր ու մեկ որդի ունի: Սարգիս Խաչատրյանն ամուսնացած չէր: 30-ամյա Էդգար Պետրոսյանը Չարենցավան քաղաքից էր: Վթարի հետեւանքով վիրավորված Մարկոս Պապյանը նույնպես Աբովյանից է: Մահացածները բոլորը եղել են «ՎԱԶ-2114» մակնիշի ավտոմեքենայի մեջ, որը վարել է Մարկոս Պապյանը: Նրանք արտագնա աշխատանքից Հայաստան էին վերադառնում՝ Ամանորն իրենց ընտանիքների հետ նշելու համար: