«Գիտելիքների հանրագիտարանի» նոր հրատարակությունը գնել են 700-ից ավելի ընթերցողներ

Տիեզերքի, երկրի, բնության, մարդու, գիտության և պատմության հրաշքները` մեկ հրատարակությունում: Հայկական «Բուկինիստ» և անգլիական «Dorling Kindersley» հրատարակչությունները փետրվարի 17-ին ներկայացրին «Գիտելիքների հանրագիտարան» գիրքը:

«Մեր հաջողության գաղտնիքն այն է, որ գիրքը ստեղծվել է սիրով: Առաջին հերթին շնորհակալություն եմ հայտնում մեր անգլիացի գործընկերներին, որոնք մեր բոլոր խնդրանքներին, պահանջներին ընդառաջ գնացին: Մենք առանց գովազդի, աղմուկի երկու ամսում վաճառեցինք 600 օրինակ, գիրքը հատել է 700-ի սահմանը: Իհարկե, կվերահրատարակենք այն»,-«Արմենպրես»-ի փոխանցմամբ` նշեց «Բուկինիստ» ՍՊԸ տնօրեն, գրքի ստեղծման նախաձեռնող Խաչիկ Վարդանյանը:

Նա շնորհակալություն հայտնեց գիրքը ստեղծողներին` շեշտելով, որ առանց ընթերցողի հրատարակիչները ոչինչ են: Խաչիկ Վարդանյանի տեղեկացմամբ` առաջիկայում հրատարակության են նախապատրաստվում «Տիեզերք», «Դինոզավրեր», «Հայաստան» հանրագիտարանները:

Շնորհանդեսին ներկա ՀՀ մշակույթի նախարար Հասմիկ Պողոսյանը նշեց, որ երկու օր առաջ է ստացել հանրագիտարանը, և ձեռք է բերել նաև այն բարեկամների համար:

«Գիրքը թերթելիս էլեկտրոնային կայքեր-գիրք հարցականը վերանում է: Հսկայական աշխատանք կատարեց Խաչիկ Վարդանյանը, պահպանելով գրախանութը, այս դժվարին ժամանակներում ինքն իր առաքելությունը համարեց չավարտված: Այսպիսի գրքերը կօգնեն ավելի սերտ կապվել ընթերցանությանը»,-շեշտեց նախարարը` հավելելով, որ Գիրք նվիրելու օրը կարելի է նվիրել նաև այս հանրագիտարանը:

Տիեզերք բաժնի թարգմանիչ, Բյուրականի աստղադիտարանի տնօրեն Հայկ Հարությունյանը շեշտեց, որ նման գրքերի հատնվելը մեծ իրադարձություն է:

«Շատ ժամանակատար էր, կարծում եմ, որ վատ չստացվեց: Անգլիական հրատարակչության որոշ սխալներ ուղղվեցին,  խնդրել եմ այդ սխալների մասին փոխանցել նրանց»,-շեշտեց նա:

Հատուկ հայ ընթերցողի համար Dorling Kindersley հրատարակչության «Գիտելիքների հանրագիտարան» գրքում ավելացված է առանձին «Հայաստան» բաժինը, որի խմբագիրն է պատմաբան, պատմական գիտությունների դոկտոր Արտակ Մովսիսյանը:

«Երբ ստացա առաջարկը, դոկտորական ատենախոսության վրա էի աշխատում: Երբ գործին ծանոթացա` անկախ զբաղվածությունից մտածեցի` ափսոս է, որ մեր երեխաները սա չունենան»,-շեշտեց Արտակ Մովսիսյանը:

Այս հանրագիտարանի առավելություններից մեկն այն է, որ նախատեսված է ընթերցողների լայն շերտի համար, պատահական չէ, որ ընթերցողներն այս գրքի մասին խոսելիս սկսեցին գործածել «ընտանեկան հանրագիտարան» տերմինը:  

Համալրված լինելով ապշեցուցիչ փաստերով, համապարփակ ժամանակագրությամբ, զարմանահրաշ նկարներով՝ այս ընտանեկան հանրագիտարանը նույնիսկ բարդ երևույթներն է դարձնում հեշտ ընկալելի: Տեղեկատվության մատուցման լիարժեք պատկերավոր համակարգը ցույց է տալիս այն, ինչի մասին այլ գրքերում միայն գրված է: