Հակաիշխանական շարժման խրոնոլոգիա. ո՞րն է ամենաակտիվ քաղաքական ուժը

Վերլուծելով վերջին ամիսների Հայաստանի քաղաքական կյանքի ժամանակագրությունը` հետաքրքիր փաստ արձանագրեցինք. ընդդիմադիր ճամբարում այս ժամանակահատվածում ամենաակտիվ և աչքի ընկած քաղաքական ուժը Միհրան Պողոսյանի նորաբաց «Հայոց համազգային միասնություն» կուսակցությունն է։

Նրա անդամները եղել են ամենաթեժ կետերում, երկրի տարբեր մասերում բողոքի ակցիաներ են իրականացրել, երբ դեռևս Բագրատ Սրբազանի շարժման մասին խոսք չկար, այնուհետև առաջին իսկ օրից աջակցություն են հայտնել Սրբազանի շարժմանը։

Ի դեպ, հարկ է նշել նաև, որ այս ուժի ներկայացուցիչները այս օրերին ամենաշատն են հետապնդվում ոստիկանության աշխատակիցների կողմից, ինչպես նաև ենթարկվում են պետական կառույցների կողմից տեռորի` ստուգումների տեսքով։

Ստեղծված լինելով ընդամենը ամիսներ առաջ՝ «Հայոց համազգային միասնություն» կուսակցությունն արդեն կարճ ժամանակահատվածում հասցրել է լինել լրատվական հոսքերի գլխագրերում, լինել ամենաշատ հոլովված քաղաքական ուժերից մեկը։

Ապրիլի 8-ին «Ոսկեպարը Հայաստան է», «Կութը Հայաստան է», «Կիրանցը Հայաստան է», «Մեզ ծնկի իջած ղեկավար պետք չէ», «Նիկոլ դավաճան» վանկարկումներով, Հայոց համազգային միասնություն» կուսակցության անդամներն իրազեկման ակցիա էին արել Մատենադարանից մինչև Կառավարության նստավայր։

Օրեր առաջ էլ ոստիկանության անհամաչափ ուժ կիրառելու հետևանքով «Հայոց համազգային միասնություն» կուսակցության անդամներից մի քանիսը մարմնական վնասվածքներ էին ստացել, կուսակցության անդամ Ժիրայր Շաքարյանին էլ ոստիկանությունից շտապ տեղափոխել էին բժշկական կենտրոն, քանի որ նրա վնասվածքները բավական լուրջ էին։

Նախօրեին «Հայոց համազգային միասնություն» կուսակցության ներկայացուցիչները մասնակցել են Բագրատ սրբազանի հետ նախատեսված հանդիպմանը, իրենց մոտեցումներն են ներկայացրել, ընդ որում, մեր աղբյուրների փոխանցմամբ, եթե քաղաքական տարբեր ուժեր սեփական շահերն ու անձնական նկրտումներն են առաջ մղում, ինչ-ինչ հարցերով փորձում պառակտել շարժումը, «Հայոց համազգային միասնություն» կուսակցությունն այն եզակի ուժերից մեկն է, որն անվերապահորեն առաջին պլանում պահում է Նիկոլ Փաշինյանի հեռացումը, քաղաքական դաշտի միավորումը և ընդդիմադիր իրական գործունեության ծավալումը։

Կուսակցությունը հիմնել է Միհրան Պողոսյանը, որն էլ վերջին շաբաթներին հայտնվել է գործող իշխանությունների թիրախի տակ, նրա դեմ ոչ միայն ոստիկանական և քաղաքական բռնաճնշումներ են իրականացվում, այլ նաև փաշինյանական վարչախումբն անցել է տնտեսական տեռորի։