Քննիչները պարզում են 30-ամյա տղամարդու մահվան հանգամանքները

ՀՀ քննչական կոմիտեի Երևանի քննչական վարչության Մալաթիա-Սեբաստիա վարչական շրջանի քննչական բաժնում քննություն է տարվում՝ պարզելու 30-ամյա տղամարդու մահվան հանգամանքները։

2016թ. փետրվարի 18-ին,  ժամը 21.30-ին, «Աստղիկ» բ/կ-ից  ահազանգ է ստացվել, որ Երևան քաղաքի Հարավ-արևմտյան թաղամասի Շրջանային 2/2 հասցեում գտնվող «Ագաթ» ինստիտուտի մոտ հայտնաբերվել է 25-ից 30 տարեկան, ինքնությունը չպարզված տղամարդու դիակ:

Ինչպես «Արմենպրես»-ին տեղեկացրին ՀՀ քննչական կոմիտեի դեպարտամենտի տեղեկատվության և հասարակայնության հետ կապերի բաժնից, դեպքի վայրի զննությամբ՝ ինստիտուտի հարակից տարածքի ճանապարհի երթևեկելի մասից դուրս, հողածածկ տարածքում, հայտնաբերվել է տղամարդու դիակ։

Պարզվել է մահացածի ինքնությունը, ով 1985թ. ծնված, Երևան  քաղաքի բնակիչ Կառլեն Ակունցն է:

Դիակի արտաքին զննությամբ  դատաբժիշկ փորձագետի կողմից բռնության ակնհայտ հետքեր չեն հայտնաբերվել:

Մահվան  պատճառը պարզելու նպատակով  նշանակվել է դիակի դատաբժշկական փորձաքննություն, որի կատարումը հանձնարարվել է  ՀՀ առողջապահության նախարարության ԴԲՓԳԳԿ-ին:

Ձեռնարկված միջոցառումների արդյունքում տվյալներ են ձեռք բերվել առ այն, որ երիտասարդը դեպքի օրն օգտագործել է «մեթադոն» տեսակի թմրամիջոց, ինչից հետո նրա ինքնազգացողությունը կտրուկ վատացել է։

Հարուցվել է քրեական գործ՝ ՀՀ քրեական օրենսգրքի 266-րդ հոդվածի 1-ին մասի հատկանիշներով։

Ձեռնարկվում են անհրաժեշտ քննչական գործողություններ՝ երիտասարդի մահվան հանգամանքները, նրան թմրամիջոց իրացրած անձի ինքնությունը պարզելու ուղղությամբ։

Նշանակվել է դատաքիմիական փորձաքննություն։

Քննության արդյունքների մասին տեղեկություն կտրամադրվի լրացուցիչ։