Ռուսաստանում շուկաների եւ տոնավաճառների ապրանքաշրջանառությունը 24 տոկոսով պակասել է

News.am-ը գրում է .

Հունվարին Ռուսաստանի սոցիալ-տնտեսական իրավիճակի մասին վերջերս հրապարակած տվյալները դրական նոտաներով աչքի չէին ընկնում. այդ երկրում արդյունաբերական արտադրությունը 2.7 տոկոսով անկում է գրանցել։ Վերջին տեղեկությունները միայն համալրել են Ռուսաստանի տնտեսական եւ սոցիալական ոլորտում բացասական գործընթացների ցուցակը։

Թեպետ ռուսաստանցիների ֆինանսական եկամուտները տարեկան կտրվածքով աճել են 3.0 տոկոսով, սակայն այդ ցուցանիշը  գերազանցող գնաճը «կուլ է տվել» այդ նվաճումը։ Այսպես՝ իրական եկամուտները (հարկերը հանած) մեկ տարում 6.3 տոկոսով պակասել են։

Ռուսաստանցիների վճարունակության անկումը հանգեցրել է ապրանքների սպառման ոլորտում շատ սպասելի փոփոխությունների։ Օրինակ՝ պարենամթերքի (այդ թվում՝ ալկոհոլ ու ծխախոտ) տեսակարար կշիռը մանրածախ ապրանքաշրջանառության մեջ մեկ տարում աճել է 0.8 տոկոսային կետով եւ կազմել 48.7 տոկոս։ Հանուն արդարության՝ նշենք, որ մեզ մոտ այդ ոլորտում եւ ոչ միայն այդ, ցուցանիշն ավելի վատ է։ Ռուսաստանի մանրածախ ապրանքաշրջանառության ֆիզիկական ծավալները հունվարին կրճատվել են տարեկան կտրվածքով 7.3 տոկոսով։

Ընդ որում, կրճատվել է (24 տոկոսով) մանրածախ շուկաների եւ տոնավաճառների ապրանքաշրջանառությունը։ Այդ օյեկտների բաժինը մանրածախ առեւտրում համեմատաբար փոքր է (հունվարին՝ 7.3 տոկոսից էլ պակաս)։ Սակայն հենց այս ոլորտում է զբաղված ԱՊՀ երկրների միգրանտների մեծ մասը։

Ռուսաստանի տնտեսության մեջ ժամանակակից ճգնաժամը ոչ միայն նավթի համաշխարհային գների անկման հետեւանք է։ Դա միայն ի հայտ բերեց ռուսական տնտեսության թույլ կողմը՝ ածխաջրածինների արտահանման վրա մեծ կենտրոնացումը։ Հայտնի է, որ համաշխարհային շուկայում գների ամենամեծ տատանումներին ենթակա է հենց հումքը, այլ ոչ թե պատրաստի արտադրանքը։

Միաժամանակ փետրվարի 18-ին Brent տեսակի մարտի ֆյուչերսները հատել են 35 դոլարի շեմը, իսկ հաջորդ օրը նորից սկսել են նվազել ԱՄՆ-ում նավթի պաշարների ռեկորդային մակարդակ գրանցելու լուրերի ֆոnին (ավելի քան 504 մլն բարել)։ Մոտ ապագայում գների վրա կազդի նաեւ Իրանի կողմից նավթի արդյունահանման ծավալների մեծացումը։