15-ամյա հանդբոլիստի սպանության գործով նիստը կրկին հետաձգվել է. Վկան դատարան չի ներկայացել

Վանաձորում 2013թ. հոկտեմբերին սպանված 15-ամյա հանդբոլիստ Դավիթ Հովակիմյանի գործով հերթական դատական նիստը կրկին հետաձգվել է: Այս մասին NEWS.am-ի թղթակցին ասաց գործով մեղադրյալ Կարեն Կունգուրցեւի պաշտպան Արայիկ Պապիկյանը:

Դատաքննությունը փետրվարի 19-ից վերսկսվել էր, քանի որ դատարանը որոշել էր կրկին հարցաքննել գործով վկաներից մեկին, որի նախաքննական եւ դատարանում տված ցուցմունքներում առկա էին էական հակասություններ:

«Վկան, սակայն, նիստին չներկայացավ: Դատարանն էլ հետաձգեց նիստը եւ նշանակեց փետրվարի 29-ին: Ենթադրվում է, որ այդ օրը վկային դատարան բերման ենթարկելու որոշում կկայացվի»,- ասաց Արայիկ Պապիկյանը:

Գործով այս վկան վերջին անգամ հարցաքննվել է 2015թ. Օգոստոսի 5-ին: Նախաքննության ժամանակ վերջինն ընդգծել էր, որ Դավիթին սպանել է Կունգուրցեւը, մինչդեռ դատարանում հայտարարել էր, թե չի տեսել` ով է դանակով հարվածել 15-ամյա պատանուն: Ի դեպ, մահացած պատանու հարազատները չեն հավատում, որ սպանությունը կատարել է գործով մեղադրյալ Կարեն Կունգուրցեւը: Կունգուրցեւն էլ է պնդում, որ ինքը մեղավոր չէ։ Լոռու մարզում խոսակցություններ են պտտվում, որ սպանության իրական մեղավորը ԱԱԾ պաշտոնյայի որդի է։

Ավելի վաղ հայտնել էինք, որ ըստ մեղադրական եզրակացության՝ Կարեն Կունգուրցեւը 2013թ. հոկտեմբերի 12-ին ժամը 18:00-ի սահմաններում կենցաղային հողի վրա վիճաբանել է եւ ապօրինաբար կյանքից զրկելու` սպանելու դիտավորությամբ դանակով մեկ անգամ հարվածել է Դավիթ Հովակիմյանի կրծքավանդակին` վերջինիս պատճառելով մարմնական վնասվածքներ, սակայն վերջինիս ընկերների` օգնության հասնելուց հետո Կարենը դիմել է փախուստի: Դեպքից անմիջապես հետո Դ. Հովակիմյանը տեղափոխվել է «Վանաձոր ԲԿ» ՓԲԸ, որտեղ ժամը 21:35-ին մահացել է:

Կարենին մեղադրանք է առաջադրվել Քրեական օրենսգրքի 34-104-րդ հոդվածի 1-ին մասով: Խափանման միջոց է ընտրվել կալանավորումը:

Նշենք, որ Դավիթը Վանաձոր էր մեկնել՝ հանդբոլի Հայաստանի առաջնության եզրափակիչ մրցաշարին մասնակցելու համար: