Ամառային կրթամշակութային ծրագիր՝ Հայաստանի և Վրաստանի երիտասարդների մասնակցությամբ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Լոռու մարզի Դեբետ համայնքում գտնվող ՔՈԱՖ ՍՄԱՐԹ կենտրոնում հուլիսի 29-ից օգոստոսի 4-ը ՀՀ կրթության, գիտության, մշակույթի և սպորտի նախարարությունը Վրաստանի կրթության, գիտության և երիտասարդության նախարարության հետ համատեղ կազմակերպում է ամառային կրթամշակութային-երիտասարդական միջազգային ծրագիր՝ ՀՀ և Վրաստանի 60 երիտասարդների մասնակցությամբ:

Ծրագրի նպատակն է նպաստել հայ և վրացի պատանիների ու երիտասարդների միջև հաղորդակցման ապահովմանն ու միջմշակութային-երիտասարդական կապերի ստեղծմանը՝ հիմքում ունենալով երկու երկրների միջև երիտասարդության շրջանում փորձի փոխանակումն ու մշակութային, սովորութային յուրահատկությունների, աշխարհագրական, լեզվական առանձնահատկությունների ճանաչողությունը։

Մասնակիցների ընտրության համար սահմանվել են մի շարք չափանիշներ, այդ թվում՝ տարիքային (16-25 տարեկան), անգլերեն լեզվի իմացության, նմանատիպ ծրագրերի մասնակցության փորձառության տեսանկյունից: Արդյունավետ հաղորդակցություն ապահովելու նպատակով կարևորվել են նաև երիտասարդների ակտիվությունն ու նախաձեռնողականությունը:

Ծրագրի մասնակիցները կբաժանվեն 5 խմբի, որոնցից յուրաքանչյուրում՝ 12 մասնակից (6 վրացի և 6 հայ համամասնությամբ)։ Յուրաքանչյուր խմբին կցված կլինի 1 խմբավար, որը ծրագրի 7 օրերի ընթացքում համակարգելու և առաջնորդելու է խմբի մասնակիցներին տարբեր միջոցառումների ընթացքում։

Ծրագրի կազմակերպման և իրականացման աշխատանքներն իրականացնելու է «Հայաստանի մանուկներ» բարեգործական հիմնադրամը. այն ունի նշված տարիքային խմբում անհրաժեշտ բովանդակությամբ ծրագրեր իրականացնելու բազմամյա փորձ, համապատասխան մասնագիտական թիմ և համալիր տարածք՝ «ՔՈԱՖ ՍՄԱՐԹ» ավանը, որն իր մեջ ներառում է ՍՄԱՐԹ կենտրոնը, Կոնցեպտ հյուրանոցը և այցելուների կենտրոնը։

ՔՈԱՖ ՍՄԱՐԹ կենտրոնը ոչ-ֆորմալ արտադպրոցական ուսումնական կենտրոն է՝ հագեցած ժամանակակից տեխնիկայով և սարքավորումներով։ Կենտրոնի լսարաններն օգտագործվելու են խմբային աշխատանքների կազմակերպման, իսկ ամֆիթատրոնը՝ ծրագրի ամփոփիչ միջոցառումների և ներկայացումների համար։

Կոնցեպտ հյուրանոցը ՍՄԱՐԹ ավանի հյուրընկալության բաղադրիչն է, որի մաս են կազմում նաև համագումարների կենտրոնը և կոնցեպտ ռեստորանը։ Ծրագրի մասնակիցների կեցությունը, սնունդը և երեկոյան ժամանցի միջոցառումները կազմակերպվելու են նշված տարածքում։

Սմարթ ավանի բացօթյա տարածքն օգտագործվելու է միջխմբային մրցակցային խաղերի կազմակերպման և ավարտական խարույկի արարողության համար, իսկ այցելուների կենտրոնը Դեբետի կիրճի տարածքում տեղեկատվական և զբոսաշրջային ծառայություններ է առաջարկելու։

Ծրագիրը ներառում է մի շարք երիտասարդական, մշակութային, սպորտային, կրթական, ճանաչողական միջոցառումներ, ինչպես նաև ինտելեկտուալ ժամանցի և մրցակցային խաղեր։ Այն ներառելու է պանելային քննարկումներ, լեզվական, երաժշտական, թատերական խաղ-առաջադրանքներ։ Ճանաչողական միջոցառումների մաս են կազմելու նաև Լոռու մարզում և Երևանում էքսկուրսիաներն ու արշավները, ինչպես նաև այց նորաբաց երիտասարդական կենտրոն։

Նշենք, որ ավելի վաղ ՀՀ կառավարության որոշմամբ 2024 թվականի պետական բյուջեում կատարվել էր վերաբաշխում՝ 18261,3 դրամ գումարի չափով՝ Հայաստանի և Վրաստանի երիտասարդների մասնակցությամբ ամառային կրթամշակութային-երիտասարդական ծրագրի իրականացման նպատակով: