Եվրոպայի ըմբշամարտի առաջնությունից հայ մարզիկներն ակնկալիքներ ունեն

Հայաստանի ըմբշամարտի երկու հավաքականներն էլ պատրաստվում են մարտի 5-13-ն անցկացվվելիք Եվրոպայի առաջնությանը: Ինչպես «Արմենպրես»-ին տեղեկացրեց Հայաստանի ըմբշամարտի ֆեդերացիայի գլխավոր քարտուղար Հրանտ Ենոքյանը, վերջին՝ նախապատրաստական հավաքը ազատ ոճայինները եւ հունահռոմեական ոճի ըմբիշները կանցկացնեÕ ¶ Բելոռուսի Ստայկի մարզաբազայում: Ազատ ոճայիններն արդեն մեկնել են, իսկ փետրվարի 24-ին կմեկնեն նաեւ հունահռոմեական ոճի ըմբիշները:

Երկու հավաքականներն էլ Բելոռուսից կմեկնեն Ռիգա, որտեղ էլ կանցկացվի Եվրոպայի առաջնությունը:

Ենոքյանի տեղեկացմամբ՝ մարտի 6-12-ը մրցագորգ են դուրս գալու ազատ ոճի ըմբիշները, իսկ մարտի 9-13-ը՝ հունահռոմեական ոճի ըմբիշները:

«Երկու հավաքականներից էլ ակնկալիքներ կան, սակայն հունահռոմեականներն ավելի ուժեղ են: Արթուր Ալեքսանյանից եւ Միհրան Հարությունյանից թերեւս ամենամեծն են սպասելիքները: Այս մարզիկները հաստատ դատարկաձեռն չեն վերադառնա»,-նշեց Հ. Ենոքյանը:

Հիշեցնենք, որ Ռիգայում ազատ ոճի ըմբշամարտի Հայաստանի հավաքականը կներկայացնեն Գարիկ Բարսեղյանը (57 կգ), Վոլոդյա Ֆրանգուլյանը (61 կգ), Դավիթ Սաֆարյանը (70 կգ), Գրիգոր Գրիգորյանը (74 կգ), Շամիր Աթյանը (86 կգ), Անդրանիկ Գալստյանը (97 կգ) և Լևան Բերիանիձեն (125 կգ):

Հունահռոմեական ոճի ըմբշամարտի Հայաստանի հավաքականում ընդգրկվել են Ռոման Ամոյանը (59 կգ), Միհրան Հարությունյանը (66 կգ), Վարշամ Բորանյանը (71 կգ), Կարապետ Չալյանը (75 կգ), Ռաֆայել Մանուկյանը (80 կգ), Մաքսիմ Մանուկյանը (85 կգ), Արթուր Ալեքսանյանը (98 կգ) և Էդգար Խաչատրյանը (130 կգ):