Վճարիր 100 000 կամ ամիսներով սպասիր. պետպատվերը սպառվել է, քաղցկեղով հիվանդները կանգնել են փաստի առաջ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին


Տևական ժամանակ է MediaHub-ը ահազանգեր է ստանում մեր քաղաքացիներից այն մասին, որ պետպատվերի տեղերը մի շարք հիվանդությունների գծով արդեն շուրջ երկու ամիս է սպառվել են և քաղաքացիները կանգնել են լուրջ խնդրի առջև:

Մասնավորապես, մեզ դիմած քաղաքացին տեղեկացրեց, որ երկու ամիս է, ինչ քաղաքացիները չեն կարողանում պետպատվերով գրանցվել «KT» «MRT» հետազոտություն անցնելու համար, ընդ որում՝ խոսքը երևանյան բոլոր բժշկական կենտրոնների մասին է. Ոչ մի տեղ չեն գրանցում.

«Ասում են՝ պետությունը փող չի փոխանցում, պետպատվերով ոչ մի հետազոտություն մինչև տարեվերջ այլևս չի արվելու: Բոլոր բժշկական կենտրոնները զանգահարել եմ, ոչ մի տեղ տեղ չունեն ու ես հիմա ստիպված պետք է 100 000 դրամ վճարեմ, որ անցնեմ հետազոտությունս, քանի որ դա պարտադիր է ու, ներողություն, իմ կյանքը հենց դրանից է կախված»,- MediaHub-ին ասաց քաղաքացին:

Այսինքն, շարունակեց նա, պետությունը ամեն քայլափոխին թմբկահարում է, որ քաղցկեցի բուժումը Հայաստանում անվճար է, բայց այսպիսի խնդիրները այդ ամպագոռգոռ հայտարարություններն անելուց, չգիտես ինչու, հաշվի չեն առնում: 

«Անվճար է անունով, բայց հիմա, տեսեք, վեց ամիսը մեկ ես պետք է ստուգվեմ, ԿՏ անեմ, եթե անվճարը՝ պետպատվերովը, չկա, ես ի՞նչ է, պետք է սպասվեմ մինչև մյուս տարվա բյուջեն հաստատվի, պետպատվեր իջեցվի, որ մարտին-ապրիլին հերթս հասնի՞: Պարզ է, որ չեմ սպասի, կյանքի հարց է այստեղ, ոչ թե շարքային “ԼՈՌ”-ի մոտ այց է, որ կարող եմ սպասել: Բայց քանի՞ մարդ կարող է վճարել 100 000 և ավելի, որպեսզի ժամանակին ստուգվի: Որքան էլ ասում են անվճար է քաղցկեղի բուժումը Հայաստանում, իրականում այսպիսի հարցերի պատճառով բուժումը ոչ էլ անվճար է»,- դժգոհեց մեր զրուցակիցը:

MediaHub-ը զանգահարեց մի շարք երևանյան բժշկական կենտրոններ՝ «Էրեբունի», «Շենգավիթ» և այլ, որտեղից հաստատեցին քաղաքացիների ահազանգերը՝ հիշյալ հետազոտությունների պետպատվերով հերթագրումը մինչև տարեվերջ փակ է: 

MediaHub-ը ուշադրության կենտրոնում կպահի այս հարցը: