Շուշանիկ Բախշյանը ո՞ր պարտականությունը չի կատարել. փաստաբանը նոր միջնորդություն է ներկայացրել

Ծննդկան Մերի Մարգարյանի մահվան մեջ մեղադրվող, «Շենգավիթ» բժշկական կենտրոնի բժշկուհի Շուշանիկ Բախշյանի փաստաբան Ալեքսանդր Սիրունյանին հասկանալի չէ իր պաշտպանյալին առաջադրված մեղադրանքը:

Այսօր՝ փետրվարի 23-ին, Ալեքսանդր Սիրունյանը նոր միջնորդություն է ներկայացրել՝ պարզելու համար, թե Մերի Մարգարյանի մահվան դեպքով Շուշանիկ Բախշյանն օրենքով նախատեսված կոնկրետ որ պարտականությունը (պարտականությունները) չի կատարել կամ դրանք կատարել է ոչ պատշաճ:

««Բնակչության բժշկական օգնության եւ սպասարկման մասին» Հայաստանի Հանրապետության օրենքի հոդված 19-ի առաջին մասի համաձայն՝ բժշկական oգնություն եւ uպաuարկում իրականացնողները պարտավոր են՝

ա) յուրաքանչյուր մարդու ցուցաբերել անհետաձգելի, առաջին բժշկական oգնություն` անկախ այդ oգնության դիմաց վարձատրությունը երաշխավորող հիմքերի եւ այլ հանգամանքների առկայությունից,

բ) ապահովել ցուցաբերվող բժշկական oգնության եւ uպաuարկման քանակական ու որակական բնութագրիչների համապատաuխանությունը uահմանված չափանիշներին,

գ) յուրաքանչյուրին տեղյակ պահել նրան տրամադրվելիք բժշկական oգնության եւ uպաuարկման տվյալ տեuակի, մեթոդների, ծավալների, տրամադրման կարգի եւ պայմանների մաuին.

դ) յուրաքանչյուր մարդու կամ բժշկական oգնության համար այլ վճարողների պահանջով տրամադրել անհրաժեշտ տվյալներ հիվանդին ցուցաբերած բժշկական oգնության եւ uպաuարկման քանակական ու որակական բնութագրիչների եւ այդ նպատակով կատարված ծախuերի մաuին.

ե) ապահովել մարդու բժշկի oգնությանը դիմելու փաuտի, նրա առողջական վիճակի մաuին հետազոտման, ախտորոշման եւ բուժման ընթացքում պարզված տեղեկությունների գաղտնիությունը, բացի Հայաuտանի Հանրապետության oրենuդրությամբ uահմանված դեպքերից.

զ) ներկայացնել վիճակագրական եւ այլ տեղեկություններ` Հայաuտանի Հանրապետության oրենuդրությամբ uահմանված կարգով.

է) հոգատար եւ հարգալից վերաբերմունք ցուցաբերել հիվանդների նկատմամբ:

Այս առումով պաշտպանական կողմիս համար հասկանալի չէ, թե նշված պարտականություններից Շուշանիկ Բախշյանը որ պարտականությունը (պարտականությունները) չի կատարել կամ դրանք կատարել է ոչ պատշաճ»:

Բացի դրանից, Ալեքսանդր Սիրունյանին հետաքրքրում է, թե այդ պարտականությունները չկատարելու կամ ոչ պատշաճ կատարելու ու Մերի Մարգարյանի մահվան միջեւ պատճառահետեւանքային կապը որ ապացույցով է հիմնավորվել, եթե փորձագետի եզրակացություններով նման կապը չի հաստատվել:

Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015 թվականի հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։

2015 թվականի հուլիսի 24-ին հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: 2015 թվականի հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» բժշկական կենտրոնում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից 2015 թ. հուլիսի 29-ին Մերի Մարգարյանը մահացել է, իսկ հաջորդ օրը թոքերի եւ գլխուղեղի այտուցից մահացել է նաեւ նրա նորածին դուստրը:

Շուշանիկ Բախշյանին մեղադրանք է առաջադրվել՝ ՀՀ քրեական օրենսգրքի  130-րդ հոդվածի 2-րդ մասով: Նա գրավի դիմաց ազատ է արձակվել: