Սերոբ Գասպարյանի տանը տանկ ու Իսկանդեր են փնտրել՝ չեն գտել, բայց կալանավորել են

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Սև հովազ» ռազմահայրենասիրական ՀԿ նախագահ, 2020 թվականի պատերազմում հերոսի մահով ընկած Ռուստամ Գասպարյանի եղբորը՝ Սերոբ Գասպարյանին կալանավորել են։ Այս մասին «Հրապարակին» տեղեկացրեց Սերոբ Գասպարյանի մտերիմներից մեկը։ 

Իսկ այսօր առավոտյան Քննչական կոմիտեն հաղորդագրություն է տարածել «Իշխանությունը յուրացնելու նախապատրաստության դեպք» հայտնաբերելու եւ 7 անձի նկատմամբ մեղադրանք առաջադրելու մասին։

Մեր զրուցակիցը պատմեց, որ 2 օր առաջ Սերոբ Գասպարյանին օդանավակայանից տեղափոխել են ԱԱԾ, իսկ ավելի ուշ դատարանւ նրան կալանավորելու որոշում է կայացրել։ 

«Հանցավոր խմբավորում կազմելու, իշխանությունը զավթելու մասով երկու հոդված են դրել անհիմն։ Երեկ չէ առաջին օը օդանավակայանից տարել էին ԱԱԾ, երեկ գիշեր էլ դատարանը սանկցիա տվեց՝ երկու ամիս կալանավորելու մասին։ Երևի սրանք կիսատ թողած գործեր ունեն անելու՝ մարդկանց ուզում են չողքացնել, հիմա ում բռնում են՝ երևի մի հարյուր հոգու այս ընթացքում նույն հոդվածով բռնել են, հետո ամիսներ անց թողել։ Մարդկանց չեզոքացնում են, որ հանգիստ ավարտին հասցնեն իրեն գործը։ 43 և 419 հոդվածի առաջին մասով են մեղադրանքները ներկայացրել»,-ասաց Սերոբ Գասպարյանի մերձավորը։ 

Մեզ տեղեկացրին նաեւ, որ Գասպարյանի կալանավորումից հետո երեկ խուզարկություն են իրականացրել նրա տանը։ Իրավապահ մարմինների ներկայացուցիչները ցուցակներով տարատեսակ զենքեր ու փող են փնտրել։ «Նույնիսկ տունը խուզարկողներն էին ծիծաղում ներկայացված մեղադրանքի վրա։ Էլ տանկ էին փնտրում, էլ Իսկանդեր, զենքերի տարբեր տեսակներ, ցուցակներ էին փնտրում, իրանցից դուրս բաներ էին ման գալիս»,-ասաց մեր աղբյուրը։ Այնինչ, գտել են ընդամենը օրինական փաստաթղթերով Գասպարյաններին պատկանող մի քանի զենք.

«Անօրինական գոնե մեկ ասեղ չեն գտել։ Ինչ էլ գտան՝ օրինական ձեւակերպված էր ու առգրավեցին»,-հայտնեց վերջինս։ Աղբյուրը տեղեկացրեց նաև, որ հարցաքննության են կանչել նաև Սերոբ Գասպարյանի որդուն, սակայն հարցաքննությունից հետո նրան բաց են թողել։ Մեր աղբյուրը վստահ է, որ Սերոբ Գասպարյանի կալանավորումը քաղաքական հետապնդում է և ուրիշ ոչինչ։ «Մեր մեղքն էլ երևի թե այս երկիրը մի քիչ ավելի շատ սիրելն է՝ դրա համար էլ կալանավորում են»,-ասաց մեր զրուցակիցը։

Հիշեցնենք, որ Սերոբ Գասպարյանը այս իշխանություններին եւ Նիկոլ Փաշինյանին ամենսուր քննադատողներից էր, նրա «Հրապարակին» բազմաթիվ հարցազրույցներ է տվել։