Տիգրան Սարգսյանը Նազարբաևի հետ քննարկել է ԵԱՏՄ-ի զարգացման հարցերը

Եվրասիական տնտեսական հանձնաժողովի (ԵԱՏՀ) կոլեգիայի նախագահ Տիգրան Սարգսյանը Աստանայում հանդիպում է ունեցել Ղազախստանի նախագահ Նուրսուլթան Նազարբաևի հետ: Ինչպես տեղեկացնում է «Արմենպրես»-ը, հղում անելով Ղազախստանի ղեկավարի մամուլի ծառայության հաղորդագրությանը, հանդիպման ընթացքում «քննարկվել են ԵԱՏՄ-ի զարգացման, երրորդ երկրների հետ միավորման տնտեսական հարաբերությունների խորացման հարցերը, ինչպես նաև գլոբալ շուկաներում ստեղծված պայմաններում անդամ երկրների գործողությունների ընդհանուր ռազմավարությունը»:

Նազարբաևը նշել է, որ ներկայում Եվրասիական տնտեսական միության ստեղծումից և գործունեությունից օգուտը ոչ մի կասկած չի առաջացնում: Նա ընդգծել է, որ ԵԱՏՀ-ի կոլեգիայում Տիգրան Սարգսյանի նախագահությունը «համընկել է համաշխարհային տնտեսության մեջ դժվարին ժամանակներին», և այդ պայմաններում «դյուրին չէ աճի նոր կետեր գտնելը»:

«Սակայն բոլոր այդ դժվարությունները ոչ մի կերպ կապված չեն Եվրասիական տնտեսական միության աշխատանքի հետ: Մեր ինտեգրացիոն միավորման վերջնական օգտակարության հարցում ես ոչ մի կասկած չունեմ»,- հայտարարել է Նազարբաևը: Նա նշել է, որ այսօր «շատ երկրներ են ցանկություն հայտնում անդամակցել միությանը կամ նրա հետ ստեղծել ազատ առևտրի գոտի»:

«Ճգնաժամը ժամանակավոր երևույթ է, իսկ մեր տնտեսությունների ընդհանուր ներուժը և շուկայի ծավալները մնում են»,- ասել է Նազարբաևը, ընդսմին հավելելով, որ «ինտեգրացիոն միավորմանն անդամակցությունը ոչ միայն հնարավորություննրի օգտագործում է նախատեսում, այլև նրա զարգացման մեջ ավանդ ներդնելու անհրաժեշտություն»:

Իր հերթին Տիգրան Սարգսյանը նշել է, որ միավորման զարգացման ընդհանուր ռազմավարության նկատմամբ Նազարբաևի դիրքորոշումը «սկզբունքային նշանակություն ունի, քանի որ հենց նրա նախաձեռնություններն ու գաղափարներն են դրվել ստեղծված միասնական եվրասիական տարածքի հիմքում»:

Ղազախստանի նախագահի մամուլի ծառայության տեղեկատվության համաձայն՝ ԵԱՏՀ-ի կոլեգիայի նախագահը «վստահություն է հայտնել, որ Ղազախստանի նախագահության տարում ինտեգրացիոն գործընթացներին զարգացման նոր ազդակ կտրվի»: