ՀՀԿ-ն ու ԲՀԿ-ն «թռնում են» Սարգսյան-Ծառուկյան հարաբերությունների ջերմացման մասին հարցից

Հայաստանյան հասարակությունը, ով սիրում է ուշի-ուշով հետեւել քաղաքական տարբեր ինտրգիների, երեկ ապրեց հերթական հիասթափությունը: ՀՀ նախագահը եւս մեկ անգամ ապացուցեց հանրությանը, որ իշխանության դեմ մինչեւ վերջ գնացող «քաղաքական տիտանները» մշտապես պատրաստ են նեղանալ եւ հեռանալ քաղաքական դաշտից , երբ նման հրահանգ տրվի, դեռ մի բան էլ ավել, գույնզգույն շարիկներ գլորել եւ լայն ժպտալ այն պահին, երբ դրա ժամանակը գա:

Ստեղծված իրավիճակի շուրջ Orer.am-ը փորձեց մեկնաբանություն ստանալ «Բարգավաճ Հայաստան» կուսակցության ներկայիս նախագահ Նաիրա Զոհրաբյանից, ով սակայն հրաժարվեց որեւէ բառ անգամ ասել ԲՀԿ նախկին նախագահի երեկվա անհասկանալի պահվածքի վերաբերյալ. «Այդ հարցի վերաբերյալ որեւէ մեկնաբանություն չունեմ, զանգեք պարոն Ծառուկյանի մամուլի խոսնակին»:

Առանձնակի ցանկություն չունենալով զրուցել մշտապես պաշտպանի դիրքերից հանդես եկող խոսնակի հետ՝Orer.am-ը կապ հաստատեց ԱԺ ՀՀԿ խմբակցության պատգամավոր Կարեն Ավագյանի հետ, ով, Սարգսյան-Ծառուկյան ազգանունները լսելուն պես վեր թռնելով տեղից, հայտարարեց, թե չի պատրաստվում պատասխանել մեր կողմից հնչեցվող որեւէ հարցի. «Կլինի՞, ես ձեր հարցերին չպատասխանեմ… Չեմ ուզում պարզապես, չեմ կարծում, որ այդտեղ հարց կարող է լինել, որ ես էլ պատասխանեմ»:

Ինչեւէ, չլսելով հարցերը, երեք անգամ շնորհակալություն եւ ցտեսություն ասելուց հետո, պատգամավորը կախեց հեռախոսը… Ինչպես ասում են, ոչինչ, այս անգամ ներում ենք մանկապարտեզային այս պահվածքը, ով լիներ Ձեր փոխարեն, որ նախարարի փափուկ եւ հարմարավետ աթոռը երազելուց բացի, այլ հարցերի մասին մտածեր, ուր մնաց՝ մեկնաբաներ:

Անտեսելով պատգամավորների խուսափողական պահվածքը՝ զրուցեցինք «Ժողովրդավարական հայրենիք» կուսակցության նախագահ Պետրոս Մակեյանի հետ, ով իր խոսքում մասնավորապես նշեց. «Դեռ ամիսներ առաջ եմ ասել, որ Ծառուկյանի նման օլիգարխը չի կարող իշխանության գալ: Երեկվա պահվածքը ապտակ էր բոլորիս` հասարակության բոլոր անդամներիս համատեղ վերցրած, որի համահեղինակն է նաեւ Ծառուկյանը: Երեկ նա ասել է, թե արյուն չի ցանկանում թափել, հարց` իսկ ժամանակին, երբ հայտարարում էր, թե մինչեւ վերջ է գնալու, չէ՞ր հասկանում՝ ինչի մեջ է մտնում: Սա երկկողմանի պատասխանատվության հարց է եւ այն միայն Սարգսյանով չի սահմանափակվում, դրա մեջ իր մեղքի բաժինն ունի նաեւ քաղաքական եռյակը եւս»:

Հարցին, թե արդյո՞ք իշխանությունը հասարակությանը եւս մեկ անգամ ապացուցեց, որ անգամ ամենաբարձր գոռացող քաղաքական նախկին եւ ներկայիս ուժերը եւ դրանց թվացյալ տերերը պարում են բացառապես իշխանության գեղեցիկ «մելոդիայի» ներքո, Պետրոս Մակեյանը պատասխանեց. «Իշխանությունը ժողովրդին ասեց, ես եմ այստեղ հարցեր որոշողը: Երեկ բացահայտ հայտարարվեց, թե ով է այս ֆիլմի սցենարիստը: Երբ ժամանակին Ծառուկյանը հոխորտում էր, հո ինքն իր կամքով չէ՞ր հոխորտում, իհարկե հնարավոր են դեպքեր, երբ նա կորցնում էր իր վերահսկողությունը եւ ասում էր, թե ինքը թագավոր է, բայց իրականում նրան խոսելու ինչ-որ չափաբաժին տվել էին, իսկ երբ փորձեց չափն անցնել, միանգամից իր տեղը դրեցին: Փաստորեն Ծառուկյանին «օգտագործեցին», որպես սպասարկող եւ դեռ շատ «կօգտագործեն»»:

Սոսե Չանդոյան