Իրանում մեկնարկել են խորհրդարանական ընտրությունները

Իրանում փետրվարի 26-ին բացվել են ընտրական տեղամասերը. երկրի քաղաքացիներն ընտրում են մեջլիսի (խորհրդարանի) և Փորձագետների խորհրդի՝ հատուկ պետական մարմնի նոր կազմը, որն ընտրում է Իսլամական Հանրապետության ղեկավարին, տեղեկացնում է «Արմենպրես»-ը՝ հղում անելով իրանական Press-TV անգլալեզու հեռուստաալիքին:

Ինչպես նշում է ՏԱՍՍ-ը, ընդամենը բացվել է շուրջ 53 հազար ընտրատեղամաս: Ընտրություններին մասնակցելու համար գրանցված են Իրանի շուրջ 55 մլն քաղաքացիներ, որոնք պետք է մեջլիսի նոր կազմի 290 պատգամավորների ընտրեն 4484 հավակնորդներից: Թեկնածուների ցուցակներում ներկայացված են Իրանի երեք հիմնական քաղաքական-կրոնական հոսանքները՝ պահպանողականները, բարենորոգիչները և չափավորները: Թեկնածուներից 500-ը կանայք են:

Փորձագետների 86-տեղանոց խորհրդին անդամակցելու է հավակնում 161 մարդ:

Մեջլիսն ընտրվում է չորս տարով, իսկ փորձագետների խորհուրդը՝ ութ տարով:

Ինչպես հաղորդում Է «Ինտերֆաքս»-ը, ընտրությունների նախօրեին Իրանի քաղաքացիներին դիմել է Իսլամական Հանրապետության ղեկավար Ալի Խամենեին, որը հորդորել է քվեարկողներին՝ զգոնություն պահպանել: «Ժողովրդին հարկավոր է այնպիսի խորհրդարան, որը կաջակցի կառավարությանը, այլ ոչ թե հանդես կգա նրա դեմ»,- ասել է նա:

Իրանի նախագահ Հասան Ռոուհանին տեքստային հաղորդագրություն է տարածել ընտրողներին շարժական հեռախոսներում՝ հորդորելով մասնակցել ընտրություններին «հանուն երկրի ապագայի կառուցման»:

Քվեարկությունը մեկնարկել է տեղական ժամանակով ժամը 08:00-ին և կավարտվի 18:30-ին, սակայն անհրաժեշտության դեպքում ընտրական տեղամասերը կարող են աշխատել ավելի երկար:

Սպասվում է, որ քվեարկության արդյունքներն ընտրական հանձնաժողովում կստացվեն ընտրական տեղամասերի փակումից հետո մեկ օրվա ընթացքում: Եվս երեք օր կպահանջվի հաշվարկի համար, հաղորդել է «Ինտերֆաքսը»: