Կախյանների առանձնատունը դիտավորյալ են հրկիզել

Լոռու մարզի Վահագնի գյուղում  44-ամյա Նվեր Քոչինյանի սպանության մեջ կասկածվող Արմեն Կախյանի առանձնատունը դիտավորյալ են այրել: Այս մասին այսօր՝ փետրվարի 27-ին, NEWS.am-ի թղթակցի հետ զրույցում ասել են  Վահագնի գյուղի բնակիչները: Նրանց խոսքով, անհայտ անձիք «ֆակելների» միջոցով ջարդել են Կախյանների տան ապակիները, ապա հրկիզել բնակարանը, որի հետեւանքով այրվել է ննջասենյակն ու միջանցքը:

NEWS.am-ի տեղեկություններով առանձնատանը բռնկված հրդեհը հայտնաբերել են տարածքում ծառայություն իրականացնող ոստիկանության Գուգարքի բաժնի ծառայողները, ովքեր էլ նախ զանգահարել են հրշեջներին, ապա նրանց հետ միասին  կանխել հրդեհի տարածումը: Նշենք, որ տան մոտ հայտնաբերվել են  այն իրերը, որոնցով հրկիզվել է բնակարանը:

NEWS.am-ի թղթակիցն հաղորդում է, որ դեպքի վայրում այս պահին մեծ թվով ոստիկաններ կան, փորձագետներն ու քննիչները այրված տան միջից գտել են նաև պարկուճներ, ինքնաձիգ եւ մի քանի փամփշտակալ:

Գյուղում այս պահին ոստիկանության Գուգարքի բաժնի ծառայողների կողմից ուժեղացված ծառայություն է իրականացվում: Ուժեղացված ծառայություն է իրականացվում նաև Կախյանի կնոջ հայրական տան մոտ, Արմեն Կախյանին պատկանող գազալցակայանում և նրան պատկանող մի քանի օբյեկտներում: Ոստիկանության վերակարգ է նշանակված նաև Կախյանների հուշաղբյուրի մոտ:

Նշենք, որ ոստիկանության Գուգարքի բաժնում կան բերման ենթարկվածներ:

Ավելի վաղ NEWS.am-ը հայտնել էր, որ Լոռու մարզի Վահագնի գյուղում փետրվարի 22-ին, դաժան սպանություն է տեղի ունեցել. գիշերը ժամը 1:30-ից 2.00-ն ընկած ժամանակահատվածում վիճաբանություն է տեղի ունեցել Վահագնի գյուղի գլխավոր փողոցում, որն ավարտվել է սպանությամբ: Գլխի շրջանում ստացված վնասվածքից մահացել է նույն գյուղի բնակիչ, 44-ամյա Նվեր Քոչինյանը:

Մեզ հայտնի դարձավ, որ սպանվածն ու սպանությունը կատարելու մեջ կասկածվողը՝ Արմեն Կախյանը, համագյուղացիներ են, տարիներ առաջ մտերիմ ընկերներ են եղել, միասին աշխատել են ՌԴ-ում, ապա ինչ-որ ֆինանսական հարցերի շուրջ անհամաձայնություններ են եղել, որն էլ վերածվել է թշնամանքի:

Լոռու մարզի քննչական բաժնում հարուցվել է քրեական գործ: Արմեն Կախյանի նկատմամբ հետախուզում է հայտարարվել: Նշենք, որ Կախյանի ընտանիքը (7 մարդ), այդ թվում կանայք ու երեխաներ, դաժանաբար սպանվել էին 2000թ-ին: