Նորերը գալու են ավանդույթներն իրենը դարձնեն և պահպանեն. Նաղդալյանը՝ կադրային սերնդափոխության մասին

Կադրային սերնդափոխությունն այն է, որ երիտասարդները  խորհրդարան գալով` պահպանեն ավագ սերնդի ավանդույթները: Այս մասին NEWS.am-ի հետ զրույցում նշել է ՀՀ Ազգային ժողովի փոխնախագահ, ՀՀԿ խմբակցության անդամ Հերմինե Նաղդալյանը՝ անդրադառնալով հաջորդ  խորհրդարանում ավագ սերնդի ճակատագրին ու երիտասարդների անելիքներին:

«Այդ հարցը մոդայիկ է դառնում ընտրությունից ընտրություն, եւ լրագրողները միշտ գրում են, որ հները վախենում են, հներին հանելու են, գալու են նորերը, լինելու է սերնդափոխություն: Այո, Սերժ Սարգսյանը խոսեց կադրային երիտասարդացման մասին,  այդ պրոցեսը մշտապես եղել է, եւ մշտապես յուրաքանչյուր կառավարման համակարգի ու բազմության մեջ, որը կառավարվում է, գոյություն ունեն սկզբունքներ էդ բազմությունը օպտիմալ մակարդակով պահելու համար»,- ասաց  Հերմինե Նաղդալյանը:

Մեր զրուցակիցը փորձեց բացատրել խորհրդարանում ավագ եւ երիտասարդ սերնդի առաքելությունն ու  երկուսի միաժամանակ  լինելու անհրաժեշտությունը:

«Անհրաժեշտ է, որ որոշակի պրապորցիայով լինեն մարդիկ, որոնք կրում են փորձ, գիտելիքներ, որոնք պահպանելու են ավանդույթները եւ անհրաժեշտ է լինեն որոշակի պրապորցիայում մարդիկ, որոնք կրում են նոր մտածողություն, պրոգրեսիվ գաղափարներ, անհրաժեշտ է, որպեսզի լինի երիտասարդություն որոշակի քանակությամբ, որը գալու է փորձ ձեռք բերելու, գիտելիքներ ձեռք բերելու, որը գալու է` վերցնելու ավանդույթները, իրենը դարձնի եւ հետագայում դրանք պահպանի»,-մեկնաբանեց խորհրդարանի  փոխխոսնակը:

Հարցին, թե օրինակ ՀՀԿ-ական պատգամավորներ Մհեր Սեդրակյանից («Թոխմախի Մհեր»), Առաքել Մովսիսյանից («Շմայս») օրինակ, ի՞նչ պետք է վերցնեն երիտասարդներն ու պահպանեն, Նաղդալյանը կտրուկ պատասխանեց.  «Ֆսյո ավարտեցինք, ֆսյո»: