Ջրի երես են հանվել «հին մեռելները». Արթուր Հարությունյանի հակառակորդներն անցել են ցուցակներին

Ինչպես արդեն տեղեկացրել էինք, այսօր Աբովյան քաղաքի ԵԿՄ կառույցի շենքի մոտ հավաքվել էր մի հոծ բազմություն: Պատճառը հունիսի 7-ին կայանալիք քաղաքապետի ընտրություններն են, ինչի հետ կապված Երկրապահ կամավորական միության եւ «Ղարաբաղյան պատերազմի վետերանների միության» անդամները բարձրաձայնեցին, թե ում կողքին են կանգնելու ընտրությունների ժամանակ:

Նկատենք, որ վերը նշված կառույցների անդամները Orer.am-ի հետ զրույցի ժամանակ հայտնեցին, որ թեպետ Աբովյան քաղաքում նախընտրական պայքարը թեժ է, այնուամենայնիվ, վիճակը վերահսկելի է: Ըստ քաղաքի բնակիչների, Արթուր Հարությունյանի մրցակիցները չափից դուրս անհանգիստ վարք են դրսեւորում, նրանք գործի են դրել ոչ միայն վարչական լծակները, այլ նաեւ ջրի երես են հանել, թեկուզ կոպիտ է հնչում, բայց «հարյուր տարվա մեռելներին»:

Ինչպես մեզ հետ զրույցում նշեց ԵԿՄ հիմնադիր անդամներից Պարգեւ Գրիգորյանը. «Ժողովուրդը խոսում է այն մասին, որ թեկնածուներից ոմանք անցել են կեղտոտ մեթոդների` հանելով մահացած մարդկանց անուն, ազգանունները եւ բնակության հասցեները: Թեպետ ինչ խոսք, դրանք խոսակցություններ են, եւ միայն փաստն արձանագրելու դեպքում, կարելի է խոսել կոնկրետ խնդրի շուրջ, բայց դե ինչպես ասում են, առանց կրակ ծուխ չի լինում»:

Իսկ ԵԿՄ հիմնադիր մեկ այլ անդամ՝ Կամո Գրիգորյանն էլ հավելեց. «Շանտաժն ու մարդկանց վախեցնելը ճիշտ քայլ չէ: Մեկին գործից են հանում, մյուսի կոմունալ վճարներն են զրոյացնում եւ այլն: Չեն հասկանում, որ մարդկանց աշխատանքից հանելով ուղղակի ձեւով նպաստում են արտագաղթին: Ես զարմանում եմ, թե ինչու են նման քայլերի դիմում, թողեք, թող մարդիկ գնան ու ընտրեն, ում որ ուզում են, կընտրեն Իվանովին, Սիդորովին կամ Պետրոսին, թող ընտրեն»:

Orer.am-ի զրուցակիցը հետաքրքիր մի նկատառում կատարեց. «Հակառակ թեւի ներկայացուցիչները չարաշահում են իրենց տիրոջ վստահությունը ու շատ անգամ դեզինֆորմացիա են տալիս: Թող մարդիկ մեզ ճիշտ հասկանան, մենք ուզում են արդար ընտրություն, այնպես թե, որ այստեղ Արթուր Հարությունյանին պաշտպանելու հարցն է միայն: Շատ զարմանալի է, բայց նրանք մեզ նայում են, ինչպես իրենց թշնամիների, սակայն իզուր, որովհետեւ մենք մեր հակառակորդներին ընդունում եւ վերաբերվում ենք, որպես հասարակ քաղաքացիների: Կասեմ իրենց լեզվով, մեզ «շուգատ» անել պետք չէ, եթե մեր տղերքը տաս հոգով հարյուր թուրքի դեմ են գնացել, ապա մեզ վախեցնել չի լինի, հատկապես, երբ բոլորս հայ ենք ու տեղի բնակիչներ»:

Սոսե Չանդոյան