Սերժ Սարգսյան. Հայաստանի հավասարակշռված արտաքին քաղաքականությունը լայն ընկալում է գտնում միջազգային ասպարեզում

Հայաստանի հավասարակշռված արտաքին քաղաքականությունը լայն ընկալում է գտնում միջազգային ասպարեզում։ Այդ մասին ասվում է նախագահ Սերժ Սարգսյանի՝ Դիվանագետի օրվա կապակցությամբ տարածած ուղերձում։

«Անկախության 25 տարիների ընթացքում Հայաստանի դիվանագիտությունը լուրջ ձեռքբերումներ է ունեցել: Դրա խոսուն վկայությունն են այս տարիների ընթացքում շուրջ 160 պետությունների հետ դիվանագիտական հարաբերությունների հաստատումը, ինը տասնյակ միջազգային կազմակերպությունների անդամակցումը, շուրջ 2000 միջազգային պայմանագրերի եւ համաձայնագրերի ստորագրումը: Դա արտաքին գործերի նախարարության կենտրոնական ապարատում եւ արտերկրում գործող՝ Հայաստանի Հանրապետության շուրջ վեց տասնյակ ներկայացուցչություններում աշխատող հայ դիվանագետների հետեւողական ջանքերի եւ եռանդուն աշխատանքի արդյունքն է:

Հայաստանի հավասարակշռված արտաքին քաղաքականությունը լայն ընկալում է գտնում միջազգային ասպարեզում, ինչը թույլ կտա Հայաստանի առջեւ ծառացած խնդիրներին լուծումներ գտնել եւ կնպաստի մեր ազգային շահերին։

Անցյալ տարի աշխարհի տասնյակ երկրներում Հայոց ցեղասպանության 100-րդ տարելիցին նվիրված հազարավոր միջոցառումների բարձր մակարդակով անցկացումը հնարավոր դարձավ նաեւ ձեր՝ դիվանագետներիդ գործուն ջանքերի շնորհիվ։ Մենք ականատես եղանք հայ ժողովրդի հետ համերաշխության բազմաթիվ դրսեւորումների, ինչը ապագայում նման ոճրագործությունների կանխարգելմանն ուղղված հերթական քայլ է:

Խորհրդանշական է, որ Դիվանագետի օրը նշում եք նոր շենքում, որը նախագծվել եւ կառուցվել է՝ հաշվի առնելով արտաքին գործերի նախարարության աշխատանքային եւ ներկայացուցչական առանձնահատկությունները։ Համոզված եմ, որ այստեղ սկիզբ են առնելու նոր ստեղծարար գաղափարներ եւ նախաձեռնություններ, որոնք մեզ առավել մոտեցնելու են մեր պետության եւ ժողովրդի նվիրական նպատակների իրականացմանը։

Վստահ եմ, որ այսուհետ եւս շարունակելու եք ձեր անձնվեր ծառայությունը՝ հանուն մեր երկրի անվտանգ եւ բարեկեցիկ ապագայի»,- նշել է նախագահը։