Պելեի կարծիքով, ՖԻՖԱ-ին փոփոխություններ են հարկավոր

Բրազիլական ֆուտբոլի լեգենդ հանրահայտ Պելեի կարծիքով, ՖԻՖԱ-ին փոփոխություններ են հարկավոր:

«ՖԻՖԱ-ի համար դժվարին ժամանակներ են սկսվել: Այս կառույցը պետք է փոփոխություններ կրի և շարունակի առաջ շարժվել»,-Պելեի խոսքը մեջ է բերում BBC-ին:

Оրեր առաջ վերընտրված ՖԻՖԱ-ի նախագահ Ժոզեֆ Բլատերը հեռանում է ՖԻՖԱ-ի նախագահի պաշտոնից: Բլատերը հրաժարականի դիմում կներկայացնի ՖԻՖԱ-ի արտահերթ հրավիրված կոնգրեսի ժամանակ:

ՖԻՖԱ-ի 65-րդ կոնգրեսի ժամանակ Ֆուտբոլի միջազգային ֆեդերացիայի նախագահ վերընտրվեց Ժոզեֆ Բլատերը: Վերջինս արդեն 5-րդ անգամ է ընտրվում այդ պաշտոնում: ՖԻՖԱ-ում լինելով դեռևս 1975 թվականից՝ Բլատերն առաջին անգամ ՖԻՖԱ-ի նախագահ դարձավ 1998 թվականին: Նախագահի պաշտոնի համար պայքարում էին երկու թեկնածու` գործող նախագահ Ժոզեֆ Բլատերը և Հորդանանի արքայազն Ալ Հուսեյնը:  Ընտրություների ընթացքում առաջին փուլի ժամանակ Բլատերը հավաքեց 133 ձայն, իսկ Հուսեյնը` 73. առկա էր երկրորդ փուլի հնարավորություն, սակայն Հուսեյնը հրաժարվեց հետագա պայքարից:

Վերջին մի քանի ամիսների ընթացքում միջազգային ԶԼՄ-ները, հատկապես ամերիկյան մամուլը, մեծ աղմուկ բարձրացրեցին` ՖԻՖԱ-ի նախագահին մեղադրելով և՚ ձայներ գնելու, և՚ կաշառակերության մեջ: Լրատվականները պնդում են՝ Բլատերը և ՖԻՖԱ-ի մի քանի անդամներ կաշառված են և վաճառել են 2018 և 2022 թվականների աշխարհի առաջնությունները Ռուսաստանում և Կատարում անցկացնելու իրավունքները: Անցած մի քանի օրերին շվեյցարական ոստիկանությունը նույնիսկ ձերբակալել էր ՖԻՖԱ-ի մի քանի աշխատակիցների: