Փորձագետը դատարանում հաստատեց՝ Հայկազ Բարսեղյանը չէր կարող ինքնուրույն կախվել

Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի մոտ կախվելու հետեւանքով առաջացած ճմլման ակոսը եղել է հետմահու, ինչը ապացուցում է, որ նա ինքնուրույն կախվել չէր կարող: Այս մասին այսօր՝ մարտի 3-ին, Ավան եւ Նոր Նորք վարչական շրջանների ընդհանուր իրավասության դատարանում ասաց հարցաքննվող փորձագետ Վիգեն Ադամյանը:

«Մահը վրա է հասել մեխանիկական շնչահեղձումից՝ պարանոցի օրգանները բութ առարկայով սեղման հետեւանքով: Հարված չի եղել, եղել է սեղմում: Հնարավոր է՝ ձեռքով: Հարվածի հետեւանքով կարող է ունենայինք սրտային կանգ, բայց ոչ մեխանիկական շնչահեղձություն»,- իր տված փորձագիտական եզրակացությունը դատարանում հաստատեց փորձագետը:

Մեղադրյալներից Գնել Թեւոսյանի պաշտպան Արա Զաքարյանը, որն, ի դեպ, պնդում է, թե Հայկազ Բարսեղյանը ինքնասպան է եղել, հայտարարեց, որ փորձագետը պետք է հաշվի առներ նաեւ դեպքի վայրի զննության արձանագրությունը, ինչը չի արել:

«Ես հիմնվում եմ միայն դիահերձման տվյալների վրա: Անգամ եթե կինոյով էլ այդ ամենը ցույց տային, ես հիմնվելու էի դիակի դատաբժշկական փորձաքննության տվյալների վրա»,- պատասխանեց փորձագետը:

Արա Զաքարյանը հարցրեց փորձագետին՝ մարդաչափական տվյալների ուսումնասիրության տվյալները բացակայում էին, անհրաժեշտ չէ՞ին արդյոք դրանք փորձագիտական եզրակացություն տալու համար:

«Նման ցուցումներ չկան դատական բժշկության մեջ: Դա մեզ ոչինչ տալ չէր կարող»,- պատասխանեց փորձագետը:

Փորձագետը նշեց, որ երբ կախել են, դիակի մոտ փայտացման նշաններ չեն եղել, բերանը եղել է բաց, պարանի օղակը սեղմել է, լեզուն դուրս է հրվել, ապա օղակը սեղմել է, ու լեզուն սեղմավծ է մնացել ատամների արանքում:

Հայկազ Բարսեղյանի հայրը՝ Արկադի Բարսեղյանը լրագրողների հետ զրույցում նշեց, որ փորձագետի ցուցմունքով ապացուցվում է, որ իր որդին ինքնասպան չի եղել, իսկ Գնել Թեւոսյանի փաստաբանի տված հարցրերը փակուղի են տանում, դրանց շնորհիվ էլ հերքվում է հենց իրենց առաջ քաշած վարկածը:

«Հենց Գնելն է այդ ամենը արել, խեղդել, դրա համար էլ Արա Զաքարյանը փորձում է նման վարկած առաջ տանել: Նույն հարցերը անընդհատ տալիս է»,- ասաց նա:

Նշենք, որ Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում: