«Ո՞վ բերեց Նիկոլին» – դիմակահանդեսն ավարտված է

Aravot.am-ը գրում է․ 

Սկիզբը՝ այստեղ:

ԱՄՆ արդյունավետության դեպարտամենտի ղեկավար Իլոն Մասկը խոստացել է կոպեկ առ կոպեկ, լումա առ լումա, հատիկ առ հատիկ հրապարակել ԱՄՆ նախկին վարչակազմի եւ USAID-ի կողմից ֆինանսավորված բոլոր գունավոր եւ անգույն հեղափոխությունների ինքնարժեքը թե՛ հետսովետական, թե՛ արաբական երկրներում եւ թե՛ մնացյալ աշխարհամասերում, որտեղ ԱՄՆ նախկին վարչակարգերն ուղղակիորեն միջամտել են ներքաղաքական գործընթացներին՝ ծրագրելով, ուղղորդելով, ֆինանսավորելով եւ կազմակերպելով հեղաշրջումներ, որոնք բոլորը շատ հուզիչ անուններ էին կրում։

Հիմա արդեն պարզ է, որ 2018-ի իշխանազավթման ողջ սցենարը եղել է դագաղ առ դագաղ, փողոց առ փողոց, կարգախոս առ կարգախոս ծրագրված, ու ես մեկ րոպե անգամ չեմ կասկածում, որ շուտով մենք անուն առ անուն լսելու ենք այն հասարակական կազմակերպությունների, գործիչների եւ կուսակցությունների անվանացանկը, ովքեր, որպես 18-ի իշխանազավթման գեներատորներ՝ հսկայական ֆինանսական եւ ինստրուկտորական աջակցություն են ստացել արեւմտյան նախկին իսթեփլիշմենթից եւ ԵՄ կվադրոբերների համույթից։

Եվ քանի որ որոշ քաղաքական աշխուժակներ ու իբր, քաղաքականությամբ զբաղվող ավանտյուրիստներ շարունակում են՝ «ո՞վ բերեց Նիկոլին» հիմարածին թեզը տարբեր հանրային հարթակներում ծամել, ինչի նպատակն, ըստ իս, իրենց քաղաքական դեֆոլտ վիճակը զրոյական կետից շարժելու անիմաստ մղումն է, եւս մեկ անգամ հիշեցնենք, որ՝ «Սերժն է բերել Նիկոլին» թեզի ներկայիս բոլոր թոփ շահառուները 18-ին իրենց ուսերի վրա Նիկոլին բերողներն էին, Նիկոլի վարչապետ ընտրվելուց րոպեներ անց արդեն դավթարները ձեռքներին, տարբեր միջնորդ դալալների միջոցով հանդիպում էին աղերսում Նիկոլից` «հայրենիքը նիկոլական ծիրի մեջ զարգացնելու» իրենց մակուլատուրան սաղացնելու եւ մի կտոր պաշտոն մուրալու համար։ Ի դեպ, սույն «փրկչական ծրագրերը», նույն այդ մարդկանց կողմից նախկինում բազմիցս հարմարեցված են եղել տարբեր ընդդիմադիր գործիչների հագով, որոնց գլուխները վերջիններս բարեհաջող կերել են։

Ես չգիտեմ՝ ինչի՞ է այս մարդկանց թվում, թե մեր հասարակությունը տառապում է քաղաքական այցհելմերիզմով եւ ոչ մի կերպ տեղը չի բերում իրենց խիստ հայտնի ֆեյսերը, որոնք 18-ի իշխանազավթման բոլոր օրերին, հրապարակներում եւ եթերներում, Նիկոլի զտարյուն քայլիստներից առավել խրոխտ Սերժ էին մերժում ու Նիկոլ քարոզում։ Ավելին, այսօր մոլի հականիկոլական խաղացող որոշ դեմքեր, 18-ի բուրիվեստնիկները, ովքեր Փաշինյանի իշխանազավթումը ողջունում էին ռուսական եւ արեւմտյան բոլոր թոփ լրատվամիջոցներից, օրինակ, ռուսական առաջին ալիքի եթերում վերնաշապիկ էին պատռում՝ «հիմնավորելով» «մերժիր Սերժին»-ի անխուսափելիությունն ու նիկոլիզմի հաղթարշավը։ Ու այդ նույն մարդիկ, իրենց սատելիտ ֆայլերի հետ, մոռանալով սեփական դուխով անցյալը, իրենց վրա իջեցված պատվերի շրջանակում, այսօր համառորեն վազում են Սերժ Սարգսյանի գրպանի հետեւից՝ Նիկոլին այնտեղ գցելու համար։

Նախօրեին ՀՀԿ փոխնախագահ Արմեն Աշոտյանը եւս մեկ անգամ ճշգրիտ տվեց նախկին դուխովների պատասխանը, ասելով՝ «2018-ի իշխանազավթումը ոչ թե «շախմատ» էր, այլ «бой без правил», որտեղ գործի դրվեց «все против одного» սկզբունքը։ Արտաքին ուժերը միակողմանի փոխեցին խաղի կանոնները՝ շահարկելով նաեւ բազմաթիվ ներքին խնդիրներ։ Խաղատախտակը շրջեցին եւ շախմատը վերածեցին «քուչի կռվի»։ Սա էր ողջ իրականությունը»։

Ես հասկանում եմ, որ պարտվածի եւ կապիտուլացվածի, Արցախը հանձնածի, Հայաստանը գոյաբանական խնդրի առաջ կանգնեցրածի հայրությունն ու հարազատությունը ոչ միայն որեւէ մեկը չի ուզում ընդունել, այլեւ Նիկոլի բազմաթիվ գաղափարական երկվորյակներ այսօր հրապարակավ հրաժարվում են իրենց պաշտպանյալից, իրենց գրեթե հայելային արտացոլանքից, սեփական մեղավորությունը փորձելով փաթաթել նախկին իշխանության պարանոցին։

Իհարկե, տրամաբանական հարց է առաջանում՝ եթե Սերժն է բերել Նիկոլին, ինչի՞ էր, ուրեմն, Նիկոլը Սերժի թիմակիցների թաղումները կազմակերպում, արեւմտյան ինստրուկտորների հետ ամենօրյա ծրագրվող գործողությունների թիրախում ինչի՞ էր բացառապես եւ միայն Սերժ Սարգսյանն ու նրա գլխավորած կուսակցությունը։ Ու ինչի՞ այդ խայտառակ վակխանալիայի ժամանակ չտեսանք որեւէ մեկ այլ թիրախ եւ որեւէ մեկ այլ քաղաքական հակառակորդ։

Թավշյա իշխանազավթումը պայքարի մեկ թիրախ ուներ՝ Սերժ Սարգսյանն ու ՀՀԿ-ն եւ առնվազն քաղաքական տրանսվեստիտ պետք է լինել՝ մեղադրելու երրորդ նախագահին՝ սեփական կուսակցության, սեփական ընտանիքի դեմ վայրագ ու սատանայական մի ամբողջ ծիսակարգի աջակցելու մեջ։

Վստահ եմ, ընդամենը ժամանակի հարց է ու բացահայտվելու է 18-ի իշխանազավթման ողջ մենյուն եւ յուրաքանչյուր ակցիայի գլխագինը։ Ինչպես Թրամփը օրերս հրապարակեց, որ անգամ այն հուզառատ կադրերը, երբ ողջ աշխարհին մատուցվեց, որ հոլիվուդյան աստղերը Կիեւում, Օդեսայում, Լվովում ուկրաինացի երեխաների գլուխներն էին շոյում, յուրաքանչյուր շոյանքը եղել է շռայլորեն վճարված ամերիկյան Պետդեպի կողմից։

Ի դեպ, օրերս աչքովս ընկավ, որ վրացական ընդդիմությունն իր հերթական վճարված ակցիայի ժամանակ կանանց էր հանել առաջնագիծ՝ իրենց նորածին երեխաների մանկասայլակներով։ Անմիջապես հիշեցի 18-ի երկվորյակ ակցիան Երեւանում։ Ու հիմա գրեթե չեմ կասկածում, որ նույնիսկ այդ մանկասայլակներն են եղել վճարված՝ ինչպես կասեր 18-ի դուխովը՝ հատիկ առ հատիկ, լումա առ լումա։

Մարիամ Ղազարյան