Սա շատ ավելի լուրջ բան է, քան ուղղակի սիրո ալիքը. Գոհար Գասպարյանը` «LoveWave» երգի հաղորդագրության մասին
Life
Հայաստանում կրկին ակտիվացել են եվրատեսիլյան կրքերը, քանի որ երկու օր առաջ պարզ դարձավ, թե ինչ երգով է Իվետա Մուկուչյանը Հայաստանը ներկայացնելու «Եվրատեսիլ 2016» երգի մրցույթում: Մինչ շատերը շարունակում են քննարկել մեր մասնակցին ու նրա «LoveWave» կոչվող երգն ու տեսահոլովակը, NEWS.am STYLE-ը զրուցեց մրցույթի հայաստանյան պատվիրակության ղեկավար Գոհար Գասպարյանի հետ` պարզելու, թե ինչ սկզբունքով է ընտրվել մեր այս տարվա երգը եւ որն է դրա գլխավոր հաղորդագրությունը.
«Ինչպես գիտեք` մենք աշնանը հայտարարել էինք կոմպոզիտորների մրցույթ եւ ամբողջ աշխարհից շատ մեծ քանակությամբ երգեր ենք ստացել: Իսկապես, այս անգամ երգերի քանակն ու որակը գերազանցում էր նախորդ տարիներին»,-ասում է Գոհարը` հավելելով, որ հեղինակները շատ էին հավանել երգչուհուն եւ ուղարկել էին Իվետային հարմար երգեր.
«Կարող եմ ասել, որ ընտրությունը շատ դժվար էր, որովհետեւ այն բաղկացած էր մի քանի փուլից: Նախ եւ առաջ` զատեցինք այն երգերը, որոնք առավել հարմար էին երգչուհուն, այնուհետեւ առանձնացրեցինք այն երգերը, որոնք մրցութային էին, հետո անցանք հաջորդ փուլին` զատեցինք հիթային եւ հիշվող երգերը. արդյունքում ունեցանք երկու երգ. մեկը շվեդ հեղինակի կողմից էր, մյուսը` հայ: Ի վերջո, կանգ առանք հայ հեղինակի ստեղծագործության վրա, քանի որ այն ավելի մոտ էր Իվետայի ներաշխարհին»:
Խոսելով այն մասին, թե որքանով է երգը համապատասխանում Իվետային` Գոհարը նշեց.
«Նա շատ էմոցիոնալ երգչուհի է եւ սա հենց այն էր, ինչ նրան պետք էր: Բացի դա` մենք միշտ ուրախ ենք աշխատել հայ հեղինակների հետ»:
Երգի երաժշտության համահեղինակները Լեւոն եւ Լիլիթ Նավասարդյաններն են, իսկ խոսքերը գրել են Սթեֆանի Քրաթչֆիլդը եւ Իվետա Մուկուչյանը:
Ըստ մեր պատվիրակության ղեկավարի` «LoveWave» գաղափարը հսկա կոնցեպտ է:
««LoveWave»-ն այն ալիքն է, որը լինում է երկրաշարժից առաջ: Սա շատ ավելի լուրջ բան է, քան ուղղակի սիրո ալիքը: Մենք այն համեմատել ենք սիրո զգացմունքի հետ եւ փորձել ենք ուղիղ համեմատական տանել սրտի թրթիռների եւ ալիքի թափահարումների միջեւ»:
Երգի գլխավոր հաղորդագրությունը հենց սերն ու սիրո ալիքը տարածելն է.
«Գաղափարն այն է, որ պետք է պահպանենք սերը եւ չթողնենք, որ այն ստեղծի երկրաշարժ անձի մեջ: Շատ զգույշ է պետք լինել այս զգացմունքի հետ»:
Գոհար Գասպարյանը վստահ է, որ այս տարի մրցույթում կհաղթի մի երգ, որը նման չի լինի նախորդ տարվա հաղթածին.
««Եվրատեսիլում» ամեն տարի նույնատիպ երգեր չեն հաղթում: Հենց այս սկզբունքով առաջնորդվելով էլ մենք նախապատվությունը տվել ենք այս ոճին: Հուսով ենք` կկարողանանք անցնել եզրափակիչ փուլ»,-ասում է Գոհարը, որը հետեւում է երգի մասին հնչած կարծիքներին.
«Այս պահին հնչած կարծիքները շատ տարբեր են` մի մասը շատ է հավանում այն, մյուսները չեն հավանում. Շատերն ասում են, որ դեռ չեն հասկանում, թե ինչ է կատարվում, հետո փոխում են կարծիքը եւ ասում, որ հավանում են: Այսինքն` սա, միգուցե, այդքան հեշտ մարսելի երգ չէ ոմանց համար, բայց նրանք, ովքեր հետեւում են մրցույթին եւ շատ են լսում ժամանակակից փոփ երաժշտություն, միանշանակ, հավանում են այս ստեղծագործությունը»:
Թե արդյունքում ինչ կստացվի, կտեսնենք նախ մրցույթի կիսաեզրափակիչ փուլում, այնուհետեւ` եզրափակչում, իսկ մինչ այդ` մեր պատվիրակության ներկայացուցիչները լսում են հնչած բոլոր կարծիքներն ու փորձում դասեր քաղել դրանցից.
«Մենք բոլորի կարծիքներն էլ հաշվի ենք առնում եւ մեր աշխատանքը կառուցում ենք` փորձելով ընգրկել մասսայական կարծիք»,-ասում է Գոհար Գասպարյանը:
Սյունե Առաքելյան
Լուսանկարները` Գոհար Գասպարյանի Facebook-ի էջից եւ Մելինե Տոնոյանի
1
2
3
4
5
2
3
5
1
2
3
4
5
