Հրապարակվել է Ալպերում օդանավը դիտավորյալ կործանած օդաչուի վերջին նամակը

Գերմանական լրատվամիջոցները հրապարակել են 2015թ. Ֆրանսիական Ալպերում կործանված Germanwings ավիաընկերության ինքնաթիռի երկրորդ օդաչու Անդրեաս Լյուբիցի վերջին նամակը:  Լյուբիցը մարտի 10-ին էլեկտրոնային փոստով նամակն ուղարկել էր իր բժիշկներից մեկին: Նամակում նա բողոքում է հոգեբանական լուրջ խնդիրներից, որոնք ի հայտ են եկել տեսողության վատացման պատճառով:

«Գիշերը առավելագույնը քնում եմ 2 ժամ, սակայն վերջին ժամանակներս դա հազվադեպ է լինում: Վախենում եմ, որ կշարունակեմ կուրանալ, եւ իմ տեսողության մասին մտքերը գլխիցս դուրս չեն գալիս: Այդ սթրեսի պատճառով ես չեմ կարողանում երկար քնել», — գրել էր օդաչուն, փոխանցում է LifeNews-ը:

Լուբիցը նկարագրել է իր այցելությունները հոգեբաններին, որոնք, իր  կարծիքով, իրեն սխալ էին հասկանում: Նա պատմել է, թե ինչ հակադեպրեսանտներ է խմում, հարցրել է, թե ինչ կարելի է անել քունը կարգավորելու համար:

Ավիավթարից առաջ մի քանի ամիս շարունակ օդաչուն այցելել էր ավելի քան 40 բժշկի, սակայն ամեն դեպքում նրան թույլ էին տվել նստել օդանավի ղեկին:

Հիշեցնենք, որ 2015թ. մարտի 24-ին Germanwings ավիաընկերությանը պատկանող, Բարսելոնից Դյուսելդորֆ թռչող Airbus А-320 օդանավը կործանվել էր ֆրանսիական Ալպերում: Օդանավում այվթարի պահին եղել էր 150 մարդ, որոնք բոլորը մահացել էին: Երկրորդ օդաչու Անդրեաս Լյուբիցը փակվել էր օդաչուների սենյակում եւ դիտավորյալ կործանել օդանավը: