Ասի՝ Վահե պետք չի, մեծ կնիկ ա, ասեց՝ չարիր, դանակը կոխում եմ. սպանության մանրամասները

Ոստւիկանությունը նոր մանրամասներ է հայտնել փետրվարի 23-ին Գեղամասար գյուղում տեղի ունեցած սպանությունից: Գեղամասարի գյուղապետը փետրվարի 23-ին ժամը ժամը 16.30-ի սահմաններում, ոստիկանության Վարդենիսի բաժնի ծառայողներին հայտնել է, որ 5 րոպե առաջ հայտնաբերել են իրենց գյուղացի Շուշանիկ Գյուլումյանի դին, իր տանը՝ գետնին ընկած:

Փորձաքննությունների արդյունքում պարզվել է, որ դիակի գլխին եւ պարանոցին կան վնասվածքի հետքեր, իսկ մահվան պատճառը մեխանիկական շնչահեղձությունն է: Այլ խոսքով՝ կնոջը խեղդամահ էին արել:

Դեպքից երկու օր անց ոստիկանություն է հրավիրվել նույն գյուղի բնակիչ, 18 տարին դեռ չբոլորած Վահե Գ.-ն, որը խոստովանել է, որ մասնակից է եղել կնոջ սպանությանը: Նա պատմել է, որ Շուշանիկ Գյուլումյանի հեռախոսազանգով ինքն ու ընկերը գնացել են նրա տուն, բարձրացել տանիք ալեհավաքի մալուխը նորոգելու: Այդ ընթացքում կինն անեծքներ է տեղացել իրենց գլխին, ինչից բորբոքված ինքը բռնել է կնոջը, իսկ ընկերը մետաղի կտորով մի քանի անգամ խփել է նրա գլխին, ու իրենք փախել են:

Հետա շրջվելով տեսել են, որ վերակենդանացած կինն իջնում է տանիքից ու շարունակում անիծել իրենց: Ինքը կնոջը քարշ է տվել տուն, իսկ անեծքի ձայները կտրվել են այն բանից հետո, երբ վախից ձեռքով սեղմել է նրա կոկորդը:

Փետրվարի 26-ին ոստիկանության Վարդենիսի բաժին է հրավիրվել նույն գյուղի մեկ այլ անչափահաս բնակիչ 18-ը չփոլորած Դավիթ Կ.-ն: Նրա պատմածը էականորեն տարբերվում էր: «Շուշիկ տատիկի հետ հելել ենք կրիշ: Միամիտ Շուշիկ տատին շրջվել ա, Վահեն, ձեռքին թել ա եղել, գցել ա իրա վիզը: Վահե պետք չի, Վահե, մեծ կնիկ ա: Ասել ա՝ չարիր, դանակը կողքդ եմ կոխում եմ: Ես էլ վախենալով արել եմ»,-պատմել է Դավիթը:

Քննությամբ պարզվել է, թե ինչու են տղաները գնացել Շուշանիկ Գյուլումյանի տուն: Իրականում Վահեն որոշել էր երաժշտական գործիք գնել, հետո այն ավելի թանկ վաճառել ծանոթին՝ գումարը մաս-մաս ստանալու պայմանով: Նա առաջարկել է Դավիթին հարձակվել կնոջ վրա եւ հափշտակել նրա փողը՝ դրա դիմաց խոստանալով որոշակի փոխհատուցում: Իսկ կնոջ տուն գնալու պատրվակը թվային սարքը կնոջ հեռուստացույցի վրա փորձարկելն  է եղել: