ՔՊ-ն էլի խաբեց. ԱԺ էթիկայի հանձնաժողով ձևավորելու համար Սահմանադրություն և Կանոնակարգ պետք է փոխվի

«Քաղաքացիական պայմանագիր» խմբակցությունը խաբեց հանրությանը, նրանք այսօրվա դրությամբ չեն կարող ձևավորել ԱԺ էթիկայի մշտական հանձնաժողով, քանի որ ՀՀ ԱԺ Կանոնակարգ սահմանադրական օրենքի համաձայն, մշտական հանձնաժողովները ձևավորվում են ԱԺ առաջին նստաշրջանում։ ArmLur.am-ի հետ զրույցում այս մասին ասաց ԱԺ ընդդիմադիր պատգամավոր Թագուհի Թովմասյանը:

Հիշեցնենք, որ երեկ իշխող ՔՊ խմբակցությունը 20 րոպե փակվեց ԱԺ 334 սենյակում, քննարկեց Անդրանիկ Քոչարյանի վարքագիծը՝ ցուցաբերված լրագրող Հռիփսիմե Ջեբեջյանի նկատմամբ, և որոշեց, որ ԱԺ «Հայաստան» և «Պատիվ ունեմ» խմբակցությունների կողմից ներկայացված նախագիծը՝ ԱԺ Էթիկայի մշտական հանձնաժողով ձևավորելու մասին, կմերժեն ԱԺ-ում: Ե՛վ ՔՊ խմբակցության ղեկավար Հայկ Կոնջորյանը, և՛ ԱԺ նախագահ Ալեն Սիմոնյանը լրագրողների հետ զրույցում հայտարարեցին, որ իրենք ԱԺ Էթիկայի հարցերով մշտական հանձնաժողով ձևավորելու կողմնակից են՝ ընդգծելով, որ այդ հարցում կունենան ընդդիմադիրների աջակցությունը:

ArmLur.am-ը զրուցեց այս թեմայով պատգամավոր Թագուհի Թովմասանի հետ՝ պարզելու՝ ինչ է մտածում նա այս առիթով:

«Մտածում եմ, թե ինչքան կարող են ՔՊ-ականները ստել, մինչև որտեղ է նրանց ստելու լիմիտը: ՀՀ Սահմանադրության 73-րդ հոդվածը և ԱԺ Կանոնակարգ օրեքի 21-րդ հոդվածը հստակ՝ առանց այլևայլությունների, սահմանում են, թե երբ, ինչպես են ձևավորվում ԱԺ մշտական հանձնաժողովները: Այս խորհրդարանը, որը ձևավորվել է 2021 թվականին, այլևս չի կարող Սահմանադրությամբ և ԱԺ Կանոնակարգ օրենքով, այս փուլում նոր հանձնաժողով ձևավորել:

Այսինքն՝ Էթիկայի հարցերով մշտական հանձնաժողով չի՞ ձևավորվի ԱԺ-ում առաջիկայում:

Այս պահի դրությամբ օրենքները թույլ չեն տալիս ձևավորել Էթիկայի հարցերով մշտական հանձնաժողով: Եթե ՔՊ-ն փոխի Սահմանադրության 73 հոդվածը (ինչն անհնար է) կամ փոխի ԱԺ Կանոնակարգ սահմանադրական օրենքի 21-րդ հոդվածը (որի համար էլ չունեն համապատասխան ձայներ), հնարավոր է տեսականորեն պատկերացնել հանձնաժողովի ձևավորման ապագան: Այս պահին ՔՊ-ն չի կարող ձևավորել մշտական նոր հանձնաժողով, իրենք ստել են ձեզ:

Իսկ ի՞նչ է լինելու Ձեր նախագծի ապագան:

Կարծում եմ, որ ԱԺ Էթիկայի ժամանակավոր հանձնաժողով ձևավորելու խորհրդարանական 2 խմբակցությունների նախագիծը կմերժվի, ինչպես խոստացել են, և Անդրանիկ Քոչարյանի լկտի վարքագիծը՝ լրագրողի հետ շփման, կմնա անպատիժ: