Ադրբեջանում աճել է ուռուցքային հիվանդությունների թիվը

Ադրբեջանի կառավարության 2015 թվականի գործունեության մասին զեկույցի համաձայն' երկրում աճել է ուռուցքային հիվանդությունների թիվը:

Ինչպես հաղորդում է «Արմենպրես»-ը' վկայակոչելով faktxeber.com լրատվական կայքը, բնակչության յուրաքանչյուր 100 հազար հոգու հաշվարկով, 2014 թվականի համեմատ (101 հոգի), 2015 թվականին այն կազմել է 106,8 հոգի:

Այդ ցուցանիշը 2010 թվականին եղել է 90,2, 2011 թվականին՝ 92, 2012 թվականին՝ 93 հոգի:

2015 թվականին Ադրբեջանում հայտնաբերվել է B և C հեպատիտով 3501 հիվանդ: Բնակչության յուրաքանչյուր 100 հազարի հաշվարկով Ադրբեջանում 2015 թվականին գրանցվել է 45 հյուծախտով հիվանդ, անկանոն կարծարախտով՝ 515 հիվանդ: Ադրբեջանում գործող 34 հեմոդիալիզի (երկամային անբավարարություն) կենտրոնում բուժում է ստանում 2800-ից ավելի հիվանդ:

Ադրբեջանի արյունաբանության և արյան փոխներարկման գիտական հետազոտությունների ինստիտուտի տնօրեն Զոհրա Ալիմիրզաևան հայտնել է, որ անցած տարվա հունիսի 1-ից մինչ այժմ ամուսնությունը գրանցելու դիմում ներկայացրած 107 500 երիտասարդներից 6 222 հոգու մոտ տալասեմիա (արյան անբուժելի հիվանդություն), 328 հոգու մոտ սիֆիլիս և 71-ի մոտ' մարդու իմունային անբավարարության վարակ' ՄԻԱՎ է հայտնաբերվել:

Արյան հիշյալ հիվանդությունները հանդիսանում են Ադրբեջանում տարածված՝ հարազատական ամուսնությունների բացասական հետևանքներից մեկը: Ադրբեջանի պրոֆեսոր Էլխան Ռասուլովի համաձայն՝ Ադրբեջանում արյունով հարազատական ամուսնությունների հաճախականությունը կազմում է 18-19 տոկոս, ինչի արդյունքում, նման ընտանիքներում ծնված երեխաները տառապում են տարբեր անբուժելի հիվանդություններով: Մասնավորապես, Ադրբեջանի բնակչության 8 տոկոսը տալասեմիայի կրողներ են հանդիսանում:

Ադրբեջանի արյունաբանության և արյան փոխներարկման կլինիկական ինստիտուտի գլխավոր բժիշկ Իսքանդեր Բագիրովի տվյալներով՝ Ադրբեջանում մոտ 800 հազար մարդ հանդիսանում են տալասեմիայի պոտենցիալ կրողներ: Ադրբեջանի խորհրդարանի սոցիալական քաղաքականության հանձնաժողովի նախագահ Խադը Ռաջաբլին, իր հերթին, նշում է, որ Ադրբեջանում ամեն տարի տալասեմիայով հիվանդ նվազագույնը 200, հեմոֆիլիայով (արյան անմակարդելիություն) հիվանդ 300 երեխաներ են ծնվում: