«Ոչ մեկին թույլ չեմ տա մոռանալ». Մարգարիտա Սիմոնյանը՝ Ցեղասպանությունից նախատատերի փրկվելու մասին

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Sputnik-ի և RT-ի գլխավոր խմբագիր Մարգարիտա Սիմոնյանի երկու նախատատերին էլ հաջողվել է ողջ մնալ Օսմանյան կայսրությունում տեղի ունեցած Հայոց ցեղասպանություից հետո։ Նրանց պատմություններն է Սիմոնյանը ներկայացրել «Տելեգրամի» իր ալիքում։

«Որքան աշխարհում մարդ կա, այնքան տեսակի հիմարներ կան,- ասում էր նախատատս` Նարտուհի Ներսեսյանը։ Նա գրել և կարդալ չգիտեր, բայց սովորեցրել է ինձ աղոթել, աստվածավախ լինել և չվախենալ մարդկանցից։ Գրեթե բոլոր մարդկանցից։ Բացի նրանցից, ում ձեռքին յաթաղան կա»,- գրել է Սիմոնյանը։

Նա պատմել է, որ 1915 թվականին Նարտուհի Ներսեսյանի աչքի առաջ յաթաղանով կտրել են նրա ծնողների, եղբայրների ու քույրերի գլուխները։ Ավագ ամուսնացած քրոջը հաջողվել է խուսափել բռնաբարությունից, նա իրեն ցած է գցել Տրապիզոնի բարձր ափից և խեղդվել։ Ողջ են մնացել միայն նախատատը` Նարտուհին և նրա կրտսեր քույրը` Ալիսան, ում պատվին հետագայում անվանել են Մարգարիտա Սիմոնյանի քրոջը։ Նրանց հայրը մահանալուց առաջ հասցրել է նրանց մեկական ոսկի տալ, որը Նարտուհին թաքցրել է այտի հետևում։

«Նրանց երկուսին` շիկահեր, կապուտաչյա աղջիկներին թուրքական ընտանիքներ վերցրին. սիրուններին ողջ էին թողնում, որպեսզի ամուսնացնեն` արյունը խառնվի։ Նրանք մեծանում էին թուրք ընտանիքում, մինչև նախատատիս գտան հարազատներն ու օգնեցին Ղրիմ փախչել»,- գրել է Սիմոնյանը։

Հենց այսպես Sputnik-ի գլխավոր խմբագրի ընտանիքը հայրական կողմից հիմնավորվեց ռուսական Ղրիմում։ Ինչ եղավ նախատատի քրոջ՝ Ալիսայի հետ, նրանք չգիտեն։

Սիմոնյանի երկրորդ նախատատը Ցեղասպանության ժամանակ մոտ 5 տարեկան էր։ Իրենց տուն թուրքերի ներխուժումից առաջ ծնողներին հաջողվել է աղջկան փաթեթել գորգի մեջ և պատին դեմ տալ։ «Նա կանգնած էր այնտեղ ու լսում էր, թե ինչպես են սպանում իր բոլոր հարազատներին։ Իսկ ընտանիքներն այն ժամանակ մեծ էին, ու նա երկար էր այդպես կանգնած։ Նրան այդպես էլ չնկատեցին։ Նա այդ գորգում մնաց մինչև իրեն գտան թուրք հարևանները»,- գրել է Սիմոնյանը։

Նա նշել է, որ հիշում է նախատատերի պատմածը և ոչ մեկին թույլ չի տա մոռանալ։