Վետերանների մեդալները դեռ չեն տվել, Եսայանը դիմել է Կառավարությանը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Հայրենական մեծ պատերազմում հաղթանակի 80-ամյակի առթիվ հայ վետերաններն անգամ մի մեդալ չեն ստացել պետությունից։ Այդ մասին MediaHub-ի հետ զրույցում վրդովված ասաց Հայաստանի վետերանների միության նախագահ Սիմոն Եսայանը։ 

Նրա խոսքով՝ մյուս երկրներում այդ հուշամեդալներն արդեն ստացել են մարդիկ, իսկ մեզ մոտ առաջին անգամ նման վերաբերմունք է դրսևորվում։

«Նման բան չէր եղել։ Ես երեկ Ռուսաստանի դեսպանատանը Կառավարության շատ ազդեցիկ դեմքերից մեկին այդ խնդիրը հայտնեցի, նա ասաց, որ իր տիրույթում չէ հարցը, մեկ այլ մարդու զանգեց, տեղեկացրեց խնդրի մասին, իմ հեռախոսի համարն էլ վերցրին, որ կապ հաստատեն»,- նշեց նա՝ չներկայացնելով, թե կոնկրետ ում հետ է խոսել։

Եսայանը հույս հայտնեց, որ առաջիկա տասը օրերի ընթացքում հարցը կլուծվի, սակայն և հավելեց՝ Զատիկից հետո կարմիր ձուն ո՞ւմ է պետք։

Հարցին, թե իր կարծիքով ինչը կարող է նման վերաբերմունքի պատճառ հանդիսացած լինել, Եսայանը պատասխանեց՝ «ինչ իմանամ»։

Ինչ վերաբերում է Մոսկվայի Կարմիր հրապարակում անցկացվող զորահանդեսին Հայաստանի կողմից զորախումբ չուղարկելուն, ապա Եսայանը կարճ նշեց՝ դա քաղաքական լուրջ հարց է, որի մեջ չի ցանկանում մտնել։ Նա խուսափեց մեկնաբանել, թե արդյո՞ք դա էլ է մեր երկրի վերաբերմունքը ցույց տալիս։

Հիշեցնենք, Նիկոլ Փաշինյանը երեկ Կարմիր հրապարակում հետևել է զորահանդեսին, որին ներկայացված են եղել ԽՍՀՄ բոլոր նախկին երկրների զորախմբերը, որոնք Հայրենական մեծ պատերազմում պայքարել են  ֆաշիզմի դեմ, բացառությամբ Հայաստանի: Սա ընդգծված քաղաքական որոշում է, որը, փաստացի, հաստատել է նաև Փաշինյանի խոսնակը՝ նշելով, որ զորախումբ ուղարկելը տոնական զորահանդեսին նպատակահարմար չեն գտել:

Հիշեցնենք նաև, որ թեև թշնամի երկրի նախագահ Իլհամ Ալիևը մայիսի 9-ին Մոսկվա այսպես էլ չժամանեց, սակայն Ադրբեջանի զորախումբը մասնակցեց զորահանդեսին:

Նարե Գնունի

Հետևեք մեզ՝ այստեղ