Մարմնամարզիկներն ամփոփեցին Եվրոպայի առաջնության արդյունքները
ՍպորտՍեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին
Հայաստանի մարմնամարզության հավաքականի անդամները գոհ են Եվրոպայի առաջնությունում իրենց գրանցած արդյունքներից, հաջորդիվ ձգտելու են ավելիին:
Եվրոպայի առաջնության եռակի չեմպիոն Արթուր Դավթյանը լրագրողների հետ հանդիպմանն ասաց՝ ուրախ է, որ կրկին կարողացավ ոսկե մեդալակիր դառնալ։
«Ուրախ եմ, որ կրկին կարողացա ոսկե մեդալ նվաճել: Իրոք, որ այս առաջնությունը շատ բարդ ստացվեց: Իմ միակ հնարավորությունը մյուս մրցակիցների հետ պայքարում երկու վարժություններն էլ անթերի ու առանց քայլի կատարելն էր: Բոլորին էլ զարմացրել էին իմ երկու ցատկերի անթերի կատարումը»,- նշեց Արթուր Դավթյանը:
Խոսելով ուսի վնասվածքից` Դավթյանն ընդգծեց, որ մինչև աշխարհի առաջնություն կկարողանա վերականգնվել ու լավ պատրաստվել այս տարվա ամենակարևոր մրցաշարին: Հետագա մրցաշարերին մասնակցելն էլ կախված կլինի վնասվածքներից:
Եվրոպայի առաջնությունում իր առաջին մեդալը կարևորեց օղակների վարժության մասնակից Արթուր Ավետիսյանը. նա դարձել է Եվրոպայի առաջնության բրոնզե մեդալակիր։
«Իսկապես ուրախ եմ, որ վերջապես ինձ հաջողվեց մեդալ նվաճել: Արդեն քանի տարի է, ինչ տարբեր մրցաշարերում 4-րդ տեղն էի զբաղեցնում: Հույս ունեմ, որ այս մեդալից հետո ես ինքս առավել վստահ կլինեմ: Մեր մարզիչները գոհ են. ուրեմն ես էլ եմ գոհ: Շարունակելու եմ քրտնաջան աշխատել, որ թերությունները վերանան մինչև հաջորդ մրցաշար»,-շեշտեց նա:
Մեծահասակների Եվրոպայի առաջնությունում իր նորամուտի մրցաշարում ոսկե մեդալակիր դարձած Համլետ Մանուկյանն ուրախ է ոչ միայն իր մեդալի, այլև ամբողջ թիմի գրանցած արդյունքների համար:
«Մեծահասակների առաջնությունում, որին առաջին անգամ էի մասնակցում, իսկապես ուժեղ մրցակցություն էր: Մենք բուն մրցաշարի ժամանակ անում ենք այն, ինչ անում ենք մարզումներին ընթացքում: Այս ամենում մեծ դեր են խաղում մեր ավագ ընկերները, որոնք մեզ շատ են աջակցում մրցաշարերի ընթացքում: Առանց նրանց աջակցության այս ամենը կարող էր չստացվել»,-շեշտեց նա:
Եվրոպայի առաջնության փոխչեմպիոն Մամիկոն Խաչատրյանի համար նշանակություն չունի, թե մրցաշարը որ տարիքային խմբում է, մրցակցությունը միշտ բարձր է:
«Թե՛ իմ, թե՛ Համլետի համար սա Եվրոպայի մեծահասակների առաջին առաջնությունն էր: Մեր լարվածությունն ու միաժամանակ նաև պատասխանատվության զգացումն ավելի մեծ էր: Փառք Աստծո, որ կարողացանք մեդալակիր դառնալ ու բարձրացնել Հայաստանի դրոշը»,-ասաց նա:
Հետևեք մեզ՝ այստեղ
1
2
3
4
5
1
2
3
4
5
1
2
5
