Մերի Մարգարյանի գործով «Շենգավիթ» ԲԿ-ի երկրորդ բժշկուհուն մեղադրանք առաջադրվեց

Անցած տարվա ամռանը մահացած ծննդկան Մերի Մարգարյանի գործով նոր մեղադրյալ կա: NEWS.am-ի այս տեղեկությունը հաստատեց Քննչական կոմիտեի նախագահի խորհրդական Սոնա Տռուզյանը:

Նրա խոսքով՝ որպես մեղադրյալ ներգրավվել է «Շենգավիթ» բժշկական կենտրոնի մանկաբարձ-գինեկոլոգ: Նրան մեղադրանք է առաջադրվել Քրեական օրենսգրքի 130-րդ հոդվածի 2-րդ մասով:

NEWS.am-ի տեղեկություններով, մեղադրյալը Անի Բաբելյանն է, որը հուլիսի 25-ին հերթապահել է եւ հրաժարվել է ընդունել Մերի Մարգարյանին: Բժշկական կենտրոնի շահերը պաշտպանող փաստաբան Կարեն Սարդարյանը հրաժարվեց որեւէ մեկնաբանություն տալ:

Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015 թվականի հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։

2015 թվականի հուլիսի 24-ին հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: 2015 թվականի հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» բժշկական կենտրոնում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից 2015 թ. հուլիսի 29-ին Մերի Մարգարյանը մահացել է, իսկ հաջորդ օրը թոքերի եւ գլխուղեղի այտուցից մահացել է նաեւ նրա նորածին դուստրը:

Շուշանիկ Բախշյանին մեղադրանք է առաջադրվել՝ ՀՀ քրեական օրենսգրքի  130-րդ հոդվածի 2-րդ մասով: Նա գրավի դիմաց ազատ է արձակվել: