ԱԺ-ն ամբողջությամբ ընդունեց բուռն քննարկումներ անցած օրինագծերի փաթեթները

Պարտադիր դրոշմավորման ենթակա ապրանքների վերադրոշմավորման ժամկետը երկարաձգող և արտերկրում շինարարական ու շինմոնտաժային աշխատանքներ կատարող կազմակերպությունների գրանցումը Հայաստանում խթանող օրինագծերն ընդունվեցին երկրորդ ընթերցմամբ և ամբողջությամբ: «Արմենպրես»-ի փոխանցմամբ' ՀՀ կառավարության կողմից ներկայացված «Առևտրի և ծառայությունների մասին» ՀՀ օրենքում լրացում կատարելու մասին» և «Առևտրի և ծառայությունների մասին» ՀՀ օրենքում փոփոխություն կատարելու մասին» նախագծերի փաթեթին կողմ քվեարկեց 98 պատգամավոր, դեմ և ձեռնպահ ձայներ չկային:

«Եկամտային հարկի մասին» Հայաստանի Հանրապետության օրենքում փոփոխություն և լրացում կատարելու մասին» և «Շահութահարկի մասին» ՀՀ օրենքում փոփոխություններ և լրացումներ կատարելու մասին» օրենքների փաթեթն ընդունվեց 68 կողմ, 14 դեմ, 17 ձեռնպահ ձայներով:

ՀՀ ֆինանսների փոխնախարար Վախթանգ Միրումյանը շեշտեց, որ եկամտահարկի և շահութահարկի օրենքների նախագծերի փաթեթով առաջարկվում է Հայաստանում գրանցված կազմակերպությունների համար շահութահարկը նվազեցնել և սահմանել 5 տոկոս, երբ դրանք բացառապես շինարարության և շինմոնտաժային գործունեություն են իրականացնում Հայաստանից դուրս և զուգահեռաբար, այդ կազմակերպությունների վարձու աշխատողների համար եկամտահարկը սահմանել 13 տոկոս: «Սա հարկային խթան է, որ արտերկրում գրանցում ունեցող կազմակերպությունները գան ու պետական գրանցում ստանան Հայաստանում»,- ասաց Վախթանգ Միրումյանը:

ՀՀ ԱԺ փոխխոսնակ Էդուարդ Շարմազանովն ընդգծեց, որ «օրենքի նախագիծը չի ազդում արտագնա աշխատանքի մեկնող մեր անհատ հայրենակիցների վրա»:

Դիտվել է 3 անգամ: