Հայկ Աֆրիկյանը` երկու տարբեր դերերում. Դերասանի գարնանային անակնկալը
Life
«Ճակատագրի գերիները», «Աննա», «Դիմակահանդես», «Անուրջներ» եւ «Անցյալի ստվերներ» հեռուստասերիալներից հայտնի ու սիրված դերասան Հայկ Աֆրիկյանին տեւական ժամանակ է` չենք տեսնում նոր ֆիլմերում: Սակայն շատ շուտով եթերային այդ բացն էլ կլրացվի, քանի որ արդեն 10-15 օր է, ինչ Հայկը զբաղված է նոր հեռուստասերիալի աշխատանքներով: Հայկին կարոտած երկրպագուներին շտապենք ուրախացնել եւս մեկ փաստով. Ֆիլմում դերասանին կտեսնենք ոչ թե մեկ, այլ, միանգամից, երկու տարբեր դերերում:
«Անցյալ» կոչվող հոգեբանական հեռուստասերիալի եւ երկար ժամանակ եթերում չլինելու մանրամասներով Հայկը սիրով կիսվեցNEWS.am STYLE-ի հետ.
«Կարելի է ասել` սա լինելու է ֆիլմի ֆորմատով հեռուստասերիալ. փորձելու ենք անել այնպես, որ այն տարբերվի սերիալային ձեւաչափից: Սա լուրջ ֆիլմ է` հոգեբանական ծանր լուծումներով, սակայն, միգուցե, հետագայում մի քիչ թեթեւանա սցենարը: Ֆիլմը սկսվում է անցյալից` մեկ տարի առաջվա գործողություններից: Գլխավոր դերում հանդես եմ եկել ես, մարմնավորում եմ հենց Հայկ անունով հերոսին, իսկ հետագայում խաղալու եմ նաեւ նրա երկվորյակ եղբոր դերը, որը հոգեբանական խնդիրներ ունեցող երիտասարդ է: Խաղային առումով այդ հերոսն ինձ համար շատ հետաքրքիր կերպար է»,-նշեց դերասանը, որը նաեւ ֆիլմի ռեժիսորն է:
Ֆիլմում կտեսնենք նաեւ Հակինթ Բաղդասարյանին, Մարիաննա Գեւորգյանին, Սեմ Ասատրյանին, Արսեն Լեւոնյանին, Ալեքսանդր Բաբասյանին, Լուիզա Շերմազյանին, Նիկոլայ Եղիազարյանին, Ռուզան Վիթին եւ Նանե Արզումանյանին: Ի դեպ, Նանեն մարմնավորում է հնց համանուն հերոսուհուն, որը գլխավոր հերոսի սիրած աղջիկն է.
«Բացի տաղանդավոր դերասաններ լինելուց, նրանք նաեւ իմ շատ լավ ընկերներն են: Առհասարակ, մեր թիմում անտաղանդ ու պատահական մարդիկ չկան` սկսած դերասաններից, վերջացրած օպերատորներից: Բոլորն էլ սիրված են, բայց ցավում եմ, որ նրանցից շատերը մոռացված են: Ի դեպ, այնտեղ նկարահանվել են նաեւ իմ` «Level One» ստուդիայի տաղանդավոր սաներից մի քանիսը: Իսկ ֆիմի սաունդթրեքը լինելու է շատ տաղանդավոր Անի Քրիստիի «Ինձ մի մեղադրիր» երգը»:
Հայկի հետ խոսեցինք նաեւ եթերից երկարատեւ բացակայության պատճառներից: Մեր հարցին դերասանը պատասխանեց հետեւյալ կերպ.
«Այսպես կարող եմ դա բացատրել. Երեւի արվեստում ինչ-որ մի բան իր տեղում չէ»,-այնուհետեւ հավելեց.
«Միգուցե բացակայությունս պետք է լրացնեի ինչ-որ ասելիքով: Եվ ահա այս գաղափարի շուրջ համախմբվեցինք իմ լավ ընկեր Պողոս Ամիրխանյանի հետ, որը սցենարի հեղինակն ու ֆիլմի պրոդյուսերն է: Կարծում եմ` մեր ֆիլմում կա ծանրություն, որն այսօր պակասում է հայկական հեռուստասերիալների մեծամասնությանը: Հուսով եմ` այն կսիրվի հեռուստադիտողի կողմից եւ նրանք ուրախությամբ կդիմավորեն իրենց սիրելի դերասաններին: Ի վերջո, ամեն ինչ իրենց համար ենք ստեղծում»:
Հայկը դեռեւս դժվարացավ նշել, թե ֆիլմը երբ եթերում կլինի, սակայն իր խոսքով` եթե ամեն ինչ իրենց ծրագրածով ընթանա, ապա «Անցյալ» հեռուստասերիալի պրեմիերան կկայանա Ապրիլի 7-ին` մայրության եւ գեղեցկության օրը, սակայն դերասանը նախընտրեց առայժմ գաղտնի պահել այն հեռուստատեսսության անունը, որով կհեռարձակվի նոր հեռուստասերիալը.
«Միայն կարող եմ ասել, որ արտերկրում ապրող մեր հայրենակիցները եւս հնարավորություն կունենան դիտել այն»,-ասում է Հայկը, որը ֆիլմին զուգահեռ զբաղվում է նաեւ երաժշտական գործունեությամբ: Այնպես որ` երգիչ Հայկ Աֆրիկյանի երկրպագուներն էլ շուտով կկարողանան վայելել նրա սոլո երգն ու տեսահոլովակը:
Սյունե Առաքելյան
Լուսանկարները տրամադրել է Հայկ Աֆրիկյանը
1
2
3
4
5
2
3
5
1
2
3
4
5
