Սամվել Կարապետյանի ուժը կմասնակցի ընտրություններին, ասում ենք՝ հայ ազգը ձև ունի. Կարապետյան

Հայաստանի հասարակական և քաղաքական կյանքում մենք հասել ենք մի կետի, երբ մեր ժողովրդի սպասելիքները չեն բավարարվում, առկա հասարակական և քաղաքական խմբերը կենտրոնանալով իրար հանդեպ ատելության, ատելություն քարոզելու վրա, մեր ժողովրդի մեջ  հակասություններ են սերմանում, և ինչքան ավելի շատ են հակասություններն ու ատելությունը, այնքան ավելի անհաջող են գնում մեր գործերը։ Այս մասին, այսօր՝ օգոստոսի 29–ին, Սամվել Կարապետյանի նախաձեռնությամբ հիմնադրված «Մեր ձևով» ժողովրդական շարժման շնորհանդեսի ժամանակ հայտարարեց համակարգող խորհրդի գլխավոր պատասխանատու, «Տաշիր գրուպ» ընկերությունների խմբի փոխնախագահ Նարեկ Կարապետյանը։

Նա, մասնավորապես, նշեց. «Այստեղ կարևոր դեր ունի իշխանության գործելաոճը, մարդիկ, ցավոք, չտրանսֆորմացվեցին ընդդիմադիր դեղին մամուլի խմբագրից պետական միավորող գործչի, ինչը մեր հասարակությունը կողջուներ։

Ընդդիմության ատելությունն էլ, որ առաջացել է անարդարություններից, խանգարում է իրավիճակին նայել սառը և ոչ էմոցիոնալ։ Տարիներ առաջ իշխանության եկած խումբը մեզ կոչում էր հպարտ քաղաքացիներ, մենք էլ ուրախանում էինք։ Այսօր նրանք մեզ մի ուրիշ բանի մեջ են համոզում, նրանք ասում են, որ մեր ազգը պետք է զիջի ու համակերպվի, որ մեր ազգը ձև չունի, որ մեր երկրի զարգացումը ոչ թե ճիշտ և հետևողական աշխատանքի մեջ է, այլ հարևաններին հանձնվելու, ազգային խորհրդանիշները կորցնելու, չտարբերվելու մեջ է։

Հարգելի հայրենակիցներ, հայ ազգը ձև ունի, մնում է բոլորին ցույց տալ մեր ձևը։

Այսօր մենք ազգային բարերար Սամվել Կարապետյանի համախոհներս և գործընկերներս հայտարարում ենք մեր ձևով կամավորական շարժման հիմնադրման մասին։ Ի՞նչ է նշանակում կամավորական շարժում և ինչու ենք մենք դրա, այլ ոչ թե կուսակցության մեկնարկի մասին հայտարարում։ Կամավորական շարժումը այն հարմար ձևաչափն է, որը թույլ կտա առանց բաժանելու մեր հասարակությանը համախմբել մարդկանց լավ, մեծ ու բարի գործեր անելու համար։

Շարժումը ապաքաղաքական կամավոր միավորում է, մարդկանց, որոնք պատրաստ են անձնուրաց ծառայել հանրօգուտ նպատակի։ Շարժման մասնակիցները կարող են լինել տարբեր մասնագիտությունների և հայացքների տեր մարդիկ, որոնք կարող են աշխատանքից ազատ ժամանակ մասնակցել շարժման աշխատանքներին։

Նշանակու՞մ է արդյոք, որ մենք կուսակցություն, կոնկրետ, ինչպես Սամվել Կարապետյանն էր ասում, սկզբունքորեն նոր քաղաքական ուժ այլևս չենք ստեղծելու։ Ոչ, չի նշանակում։ Սա մեր կատարելիք աշխատանքի միայն առաջին փուլն է, Հայաստանում առաջիկայում ընտրական գործընթացներ են սպասվում և դրանց մասնակցելու օրենքով նախատեսված ամենահարմար ձևը կուսակցական մասնակցությունն է։

Եվ մեր գործունեության երկրորդ փուլում մենք պատրաստվում ենք մեր մշակած մասնագիտական ծրագրերը, նախագծերը, շարժման հիման վրա ստեղծվելիք կուսակցության միջոցով վերածել պետական ծրագրերի։ Վստահ ենք որ կարողանալու ենք դա անել 2026 թվականին կայանալիք ընտրական գործընթացների արդյունքում։

Եվ այսպես, ինչո՞վ է զբաղվելու շարժումը շարժումը իրականացնելու է գործողություններ հինգ ուղղություններով ստեղծվելու է հինգ աշխատանքային խումբ։ Ես կթվարկեմ, թե խմբերի հիմնական ուղղությունները որոնք են և բոլորս կհասկանանք, թե ինչ կարևոր նշանակություն են նրանք ունենալու մեզ համար։

Առաջին խումբը մենք անվանել ենք նոր տնտեսություն, աշխատանք բոլորի համար, բարեկեցություն բոլորի համար։ Հայաստանի տնտեսությունը, որը բաղկացած է երեք հիմնական ճյուղից՝ արդյունաբերություն, ծառայություններ և գյուղատնտեսություն, հիմնականում հիմնված է Սովետական Հայաստանի փլատակների վրա հիմնված ընկերությունների վրա։

Հայաստանը 30 տարիների ընթացքում գրեթե չի ստեղծել տնտեսական զարգացման նոր մոդել, որ ամեն հաջորդ կառավարությունը իմանա, որ պետք է շարունակի նախորդ կառավարության վերցրած մոդելը, երկարաժամկետ մոդել։ Մենք հավաքելու ենք համաշխարհային և հայկական տնտեսագետների թիմ և նրանք մշակելու են Հայաստանի տնտեսական զարգացման նոր մոդելը»։