Ով գնալու է եղել՝ գնացել է, մյուսները չեն հեռանում․ ինչ է կատարվում սահմանամերձ գյուղերում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Աշնանացանի ժամանակն է, բերքահավաքի ժամանակն է, մարդիկ իրենց գործերով են զբաղված, «Հրապարակի» հետ զրույցում ասաց Գեղարքունիքի մարզի Սոթքի վարչական ղեկավար Սևակ Խաչատրյանը: Հետաքրքվեցինք՝ արդյոք գյուղից հեռացողներ եղե՞լ են։ Ասաց՝ չեն եղել: Ինչ վերաբերում է աշխատանքային զբաղվածությանը, ապա Սոթքի հանքից ազատված գյուղացիների ճնշող մեծամասնությունը վերականգնվել է իր նախկին գործում, մյուսների մասով էլ հիմա աշխատանքներ են տարվում՝ նրանց նախկին աշխատանքում վերականգնելու ուղղությամբ: Սոթքում այս պահին բնակվում է մոտ 200 ընտանիք, գյուղն ապրում է իր բնականոն կյանքով:

Տավուշի մարզի Մովսես գյուղի վարչական ղեկավար Աշոտ Փոլադյանն ասաց, որ իրենց մոտ դեռևս աշնանացանը չեն սկսել՝ հողն են վարում գյուղացիները: «Սահմաններում խաղաղություն է, կրակոցներ չկան շուտվանից: Մարդիկ գյուղատնտեսական աշխատանքներով են զբաղված, բերքահավաք է, հողն են վարում»,-ասաց Փոլադյանը:

Գյուղից հեռացողներ չկան վերջին մի քանի տարիներին՝ ասաց Մովսեսի վարչական ղեկավարը: «Արտագնա աշխատանքների են գնում, երկու ընտանիք, օրինակ, վերադարձել է»,-ասաց Փոլադյանը:
Հարցին Մովսեսի բնակիչները հավատո՞ւմ են խաղաղությանը, թե հակված են կարծել, որ խաղաղություն մեր հարեւանների հետ հնարավոր չէ, ասաց, որ մի մասը հավատում է խաղաղությանը, իսկ մյուս մասը կարծում է, որ խաղաղություն չի կարող լինել: «Աշխատանքի բացակայությունն ամենամեծ խնդիրն է: Ջրի ներքին և արտաքին ցանցերն էլ մյուս տարի արդեն կլինեն, նախագծային փուլում է: Հովնանյան ընտանիքի շնորհիվ կլինի այս ցանցը»,-ասաց Աշոտ Փոլադյանը:

Սյունիքի մարզի Խնածախ բնակավայրի վարչական ղեկավար Սեյրան Միրզոյանն ասաց, որ տարածված լուրերն այն մասին, որ գյուղը դատարկվում է՝ իրականությանը չեն համապատասխանում: «Ով գնալու է եղել՝ գնացել է, բայց ասել, որ դատարկվում է՝ մի քիչ աբսուրդ է: Այս պահին 130 տուն ունենք: Այս պահին գնացող չունենք»,-ասաց Միրզոյանը:

Հարցին, իսկ մինչև 2020-ի պատերազմը գյուղում քանի տուն է եղել, ասաց՝ 145 տուն: Վերջին հեռացողը երեք ամիս առաջ է գնացել: Իսկ հեռանալու պատճառը նշում են աշխատանքի բացակայությունը: Կրակոցները չե՞ն մարդկանց հեռանալու պատճառը, Միրզոյանն ասաց, որ իր հետ զրույցում աշխատանքի բացակայությունն են նշել, իսկ թե իրականում որն է խորքային պատճառը՝ ինքը չի կարող ասել: Գյուղի ջրի ներքին ցանցն այս պահին վերանորոգվում է, փոխվում է՝ նոր ներքին ցանց են կառուցում և մեկ ամսից քսանչորսժամյա ռեժմով ջուր կունենան:

«Մեկ ամիս է, ինչ կրակոցներ չկան, նույնիսկ օդ չեն կրակում այս պահին: Այս պահին բան չի նկատվում՝ նորմալ է»,-ասաց Միրզոյանը:

Հետևեք մեզ՝ այստեղ