Թուրքիայում խորհրդարանական ընտրություններ են

Թուրքիայի քաղաքացիները հունիսի 7-ի վաղ առավոտվանից գնում են ընտրատեղամասեր՝ ընտրելու երկիրն առաջիկա 4 տարիների խորհրդարանի անդամներին: Առաջին հայացքից հերթական՝ 25-րդ խորհրդարանական ընտրություններն իրականում կարևոր են երկրի առաջիկա տարիների զարգացումը կանխորոշելու ճանապարհին:

Ընտրություններին մասնակցող 20 կուսակցություններից հաղթելու ամենահավանական շանսերն ունեն միայն չորսը՝ իշխող «Արդարություն և զարգացում» կուսակցությունը, ընդդիմադիր Հանրապետա-ժողովրդական կուսակցությունը, ազգայնական «Ազգայնական շարժում» կուսակցությունը և քրդական Ժողովուրդների դեմոկրատական կուսակցությունը, որն առաջին անգամ է առաջադրվել խորհրդարանական ընտրություններում:

Նախքան ընտրություններն իրականացված տարբեր հարցումների արդյունքները ցույց էին տալիս, որ ի տարբերություն նախորդ տարիների՝ այս ընտրություններում նախագահ Ռեջեփ Թայիփ Էրդողանի և վարչապետ Ահմեդ Դավութօղլուի կուսակցությունը կկորցնի ձայների զգալի մասը: Եթե 2011 թվականի ընտրություններում կուսակցությունը ստացել էր ձայների 46,58 տոկոսը, ապա վերջին տարիների զարգացումներից հետևանքով կուսակցության հեղինակության անկման պատճառով այս տարի այդ ձայները կարող են պակասել: Այդուհանդերձ, եթե կուսակցությունը ստանա 40 և ավել տոկոս ձայն, ապա այն կկարողանա ունենալ խորհրդարանում անհրաժեշտ մեծամասնությունը՝ սահմանադրական բարեփոխումներ իրականացնելու և երկրի նախագահին ավելի շատ լիազորություններ տալու համար:

Թուրքիայի խորհրդարանական 25-րդ ընտրությունների երկրորդ կարևորագույն հարցն այն է, թե արդյոք քրդական Ժողովուրդների դեմոկրատական կուսակցությունը կկարողանա հաղթահարել աշխարհում ամենաբարձր՝ 10 տոկոսի նախընտրական շեմը և ներկայացված լինել մեջլիսում: Նախկինում քրդական կուսակցության անդամներն առաջադրվում էին որպես անկախ թեկնածուներ՝ մեջլիսում հիմնելով իրենց կուսակցության խմբակցությունը: Նախընտրական շեմի հաղթահարման պարագայում նախատեսվում է, որ քրդերը կստանան 550 մանդատ ունեցող խորհրդարանում 50-60 տեղ, ինչն աննախադեպ կլինի նրանց համար:

Երկրի ներսում ընտրություններին կմասնակցի 53 միլիոն 765 հազար 231 մարդ: Արտերկրում քվերակելու գործընթացն ավարտվել է մայիսի 31-ին և աչքի է ընկել ընտրողների պասիվությամբ. ընտրելու իրավունք ունեցող 2 միլիոն 867 հազար 658 քաղաքացուց ընտրություններին մասնակցել է միայն շուրջ 35 տոկոսը:

Խորհրդարանական ընտրություններում ներգրավված են նաև պատգամավորության 165 անկախ թեկնածու:

Թուրքիայի ժամանակով 08:00-ին մեկնարկած ընտրությունները կավարտվեն 17:00-ին, ինչից հետո կսկսվի ձայների հաշվարկը: